Búgin Berdaq atındaǵı Qaraqalpaq mámleketlik universitetinde universitet professor-oqıtıwshıları, student-jaslar hám Qaraqalpaqstan Respublikası Jazıwshılar awqamı aǵzaları qatnasıwında «Ádebiyatlar doslıǵı-Xalıqlar doslıǵı» atlı ádebiyat kúnleri sheńberinde Ózbekstanda xızmet kórsetken mádeniyat xızmetkeri, Qaraqalpaqstan xalıq shayırı Rustam Musurmonnıń 60 jıllıq yubileyi múnásibeti menen ilaj bolıp ótti. Onda Ózbekstan Respublikası Jazıwshılar awqamı baslıǵı orınbasarı, tanıqlı shayır hám awdarmashı Ǵayrat Majid, Ózbekstan Respublikası Jazıwshılar awqamı baslıǵınıń til boyınsha másláhátshisi, Ózbekstan Respublikası xızmet kórsetken jurnalist hám tanıqlı shayır Salim Ashur, Ózbekstanda xızmet kórsetken mádeniyat xızmetkeri, Qaraqalpaqstan xalıq shayırı; Rustam Musurmon hám “Sharq yulduzi” jurnalı bas redaktorı, tanıqlı shayır hám awdarmashı Sirojiddin Rauflar miymanda boldı.
Ilajdı Qaraqalpaqstan Respublikası Jazıwshılar awqamı baslıǵı K.Karimov ashıp berdi hám alıp bardı. Dáslep universitet jaslar máseleleri hám ruwxıy–aǵartıwshılıq isleri boyınsha prorektorı S.Alawatdinov sózge shıǵıp, ádebiyat tarawınıń pidayısı, jazıwshı hám shayır, Qaraqalpaqstan xalıq shayırı Rustam Musurmonnıń 60 jıllıq yubileyi menen universitet rektoratı atınanan qızǵın qutlıqladı.
Bunnan soń, sózge shıqqanlar, yubiley iyesiniń ómiri, alıp barǵan dóretiwshilik jumısları, onıń adamgershilik pazıyletleri, shańaraq hám jumıstaǵı pidayılıq xızmetleri haqqında kóplegen maǵlıwmatlar berdi. Ilaj universitet talantlı studentleri tárepinen tayarlanǵan koncert baǵdarlaması menen dawam etti.
QMU baspasóz xızmeti
