Búgin 10-yanvar kúni Qaraqalpaq mámleketlik universitetinde magistratura basqıshında oqıp atırǵan magistrantlar menen ushırasıw keshesi bolıp ótti. Onda universitet oqıw isleri boyınsha prorektorı O.Duysenbaev, Magistratura bólimi baslıǵı, I.Allambergenov, Korrupciyaǵa qarsı gúresiw Kompleans qadaǵalaw bólimi baslıǵı K.Uteniyazovlar qatnastı. Ushırasıwdı Magistratura bólimi baslıǵı I.Allambergenov ashıp berdi hám alıp bardı. Ol óz sózinde Húrmetli Prezidentimizdiń baslaması menen mámleketimizde bilimlendiriw tarawında alıp barılıp atırǵan reformalar, jaslarǵa jaratılıp atırǵan keń múmkinshilikler haqqında aytıp, bunıń ayqın mısalı retinde 2022-jıl 7-marttaǵı «Shańaraq hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı 87-sanlı Prezident pármanına tiykar 2022/2023 oqıw jılında universitetimizde 412 2022/2023 oqıw jılında 172 hayal-qızlardıń kontrakt tólemleri mámleket tárepinen tólep berilgenligin ayrıqsha maqtanısh penen atap ótti.
Bunnan soń, oqıw isleri boyınsha prorektor O.Duysenbaev, sózge shıǵıp, magistrantlardıń oqıwı, ilimiy-izertlew jumısları menen shuǵıllanıwı ushın zárúr sharayatlar jaratıw, bul baǵdarda ámelge asırılıp atırǵan jumıslar haqqında aytıp ótti. Sonday-aq, ÓzR Prezidentiniń 2021-jıl 19-maydaǵı PQ-5117-sanlı qararı hám ÓzR Ministrler Kabinetiniń 312-sanlı qararınıń orınlanıwın támiynlewde 2022-2023-oqıw jılında magistratura bólimine qısqı qabıllaw nátiyjeleri boyınsha oqıwǵa usınıs etilgen talabanlar, oqıw dawamında talap etilgen dárejedegi (B2, C1) shet tilin biliw dárejesi boyınsha tiyisli milliy yamasa xalıqaralıq dárejedegi sertifikattı alıwı shárt ekenligi, kerisinshe jaǵdayda, juwmaqlawshı mámleketlik attestaciyasına ruxsat etilmeytuǵınlıǵın eskertip ótti.
Sonıń menen birge, Kompleans qadaǵalaw bólimi baslıǵı K.Uteniyazov sózge shıǵıp, házirgi waqıtta rawajlanıwdıń tamırına balta urıp kiyatırǵan korrupciya illeti, onıń aldın alıwda jámiyetshilik qadaǵalawdı kúsheytiw kerek ekenligin aytıp, bársheni bul jaman illetke qarsı gúresiwde biyparwa bolmawǵa shaqırdı. Ilaj dawamında usı baǵdarda alıp barılatuǵın jumıslardıń nátiyjeliligin arttırıw, júz berip atırǵan mashqalalardı óz waqtında anıqlaw, olarǵa birgelikte sheshim tabıw, bilimlendiriwdiń sapasın arttırıw boyınsha magistrantlardıń pikir-usınısların tıńlandı hám qızıqtırǵan sorawlarına ushırasıw qatnasıwshılarınan juwaplar aldı.
QMU baspasóz xızmeti
