Qaraqalpaqstanda ilimniń jańa tarawı bolǵan arxeologiya mektebi qáliplesiwinde alıp barılǵan arxeolog ilimpaz alımlardıń biri bolǵan arxeolog Mirzalı Turebekovtıń 70 jıllıq yubeleyine baǵıshlanǵan «QUBLA ARAL BOYÍ TARIYXÍ HÁM ARXEOLOGIYaSÍ: IZERTLEWLER, IZLENIWLER» atamasındaǵı ilimiy – ámeliy seminar shólkemlestirildi. Ilmiy seminarǵa fakultet professor oqtıwshıları, ilimpazdıń jaqın insanlari hám shágirtleri qatnastı. Seminar dawamında alımnıń ómir jolı, alıp barılǵan arxeologiyalıq izertlew jumısları haqqında keńnen sáwbetlesiwler alıp barıldı hám shágirtleri tárepinen ustaz haqqında jaqsı pikirleri menen bólisildi.
Qaraqalpaqstanda ilimniń jańa tarawı bolǵan arxeologiya mektebi qáliplesiwinde alıp barılǵan arxeologiyalıq izertlewlerge B.Saypanov, M.-Sh., Qdırniyazov, O. Yusupov, Ǵ. Xojaniyazovlar qatarına 1970-jılları M.Turebekov kelip qosıladı. Nátiyjede Qaraqalpaqstanda ekinshi áwlad arxeologiya mektebiniń wákili Mırzalı Turebekov 50 jılǵa shamalas óziniń ómirin arxeologiya ilimine baǵıshlap ilim hám bilimlendiriw menen shuǵıllanıp ustazlıq etti hám de 150 den aslam ilimiy maqalalar, oqıw qollanbalar hám sabaqlıqlar jazıp qaldırdı.
Mırzalı Turebekov universitet ilim hám bilimlendiriw tarawında jas áwladtı ana Watanǵa sadıqlıq, milliy hám ulıwma insanıylıq qádriyatlar ruwxında joqarı bilimli etip tárbiyalawda óziniń qosqan múnásip úlesleri, ruwxıylıq hám aǵartıwshılıq islerinde belsendilik kórsetip, pidayılıq penen alıp barǵan xızmetleri ushın 2020-jıl 1-oktyabr “Muǵallimler hám ustazlar” kúni múnásebeti menen “Mehr – saxovat” kókirek belgisi menen sıylıqlanadı.
Ózbekstan hám Qaraqalpaqstanda arxeologiya hám tariyx ilimleriniń qáliplesiwi hám rawajlanıw basqıshlarında salmaqlı úles qosqan, Qaraqalpaqstannıń materiallıq mádeniyatı, biybaha arxeologiyalıq obektlerin eliw jıldan aslam waqıt dawamında turaqlı, xarmay-talmay miynet etken, milliy mádeniyatımızdıń pidayısı bolǵan -arxeolog – alım Mırzalı Turebekovtıń ilimiy izertlewlerdegi mártlik hám mánawiy xızmetleri keleshek jaslarǵa úlgi hám maqtanısh boladı.
Belgili alım, mehriban ustaz, kemtar insan Mırzalı Turebekovtıń insanıylıq pazıyleti, pidayılıǵı, miynetkeshligi, joqarı dárejedegi ilimiy hám siyasiy bilimi, jaslarǵa tálim-tárbiya beriwde, universitet jámááti arasında úlken abıroyǵa iye bolıp, jámiyetimiz hám respublikamızdıń social-ekonomikalıq rawajlanıwı ushın xızmet etetuǵın qánigeler jetilistirip barıwda jigerli miynetler kórsetti. Mırzalı Turebekov tiri bolǵanında 2024–jılı 70-jıllıq torqalı toyın belgileytuǵın edik. Biraq, sum ájel onı 2022-jılı aramızdan alıp ketti, qudaylıq iske hesh bir insannıń sharası joq, – degen menen bárshemizge ilim úyretken, ómir sabaǵın bergen jankúyer, pidayı ustazımız Mırzalı Tórebekovtıń jarqın esteligine tereń húrmet keltirip, shın kewilden tázim etemiz.
Shını menen de, óziniń kóz nurın, qálbindegi mehirin, pútkil barlıǵın jaslar tárbiyasına baǵıshlaǵan marxum ustazımızdıń miyneti, mártligi hár qanday joqarı bahalarǵa múnásip bolıp, onıń ilimiy pedagogikalıq xızmetleri xalqımızdıń hám shákirtleriniń yadında máńgi saqlanıp qaladı.
Azatov Allayar
Arxeologiya kafedrasi oqtıwshısı
