O’zLiDeP Qaraqalpaqstan Respublikalıq Keńesi tárepinen Berdaq atındaǵı Qaraqalpaq mámleketlik universiteti Ch.Abdirov atındaǵı mádeniyat sarayında «Deputat hám jaslar» atamasında ushırasıw bolıp ótti. Onda partiyanıń Qaraqalpaqstan Respublikalıq Keńesi xızmetkerleri, Oliy Majlis Nızamshılıq palatası deputatları M. Ibragimov, B. Aldamuratov, universitet professor-oqıtıwshıları,  student-jaslar hám ǵalaba xabar quralları wákilleri qatnastı. Ushırasıwdı universitettiń jaslar máseleleri, ruwxıylıq-aǵartıwshılıq isleri boyınsha prorektor S. Alawatdinov ashıp berdi hám basqarıp bardı. Ushırasıwda tiykarınan Prezidentimiz tárepinen qabıl etilip atırǵan qarar hám pármanlar,  «Ózbekstan – 2030» strategiyasınıń mazmun-mánisin keń jámiyetshilikke ásirese jaslar arasında úgit-násiyatlaw, jaslardı kásipke hám isbilermenlikke keńirek tartıw, búgingi kúnde elimizde jaslarǵa hár bir tarawda qolay sharayatlar jaratılıp atırǵanlıǵı hám imkaniyatlar esigi ashıq ekenligi boyınsha máseleler sóz etildi. Sonday-aq, Jańa Ózbekstandı qurıwda jaslardıń ornı, olardıń huqıqıy bilimlerin jánede asırıw, zamanagóy pikirley alatuǵın bilimli, jámiyette múnásip orın iyelewine umtılıwshań bárkamal áwladtı tayarlaw, olardıń huqıqıy mádeniyatın qáliplestiriw boyınsha maǵlıwmatlar berip ótti. Student-jaslar nızamshılıqtaǵı jańalıqlar boyınsha ózlerin qızıqtırǵan sorawlarına juwaplar aldı.