Usı jıldıń 22-24 yanvar kúnleri «Yarım ótkizgishler fizikası» kafedrası baslıǵı, professor Qanatbay Ismaylov hám «Elektr energetikası» kafedrası baslıǵı, docent Kamal Reymovlar Evropa Awqamı (ERASMUS+ Higher Education Capacity Building) tárepinen qarjılandırılıp atırǵan «DEBSEUz- Development of the targeted Educational program for Bachelors in Solar Energy in Uzbekistan»  xalıq aralıq joybar sheńberinde Al-Xorezmiy atındaǵı Tashkent informaciyalıq texnologiyaları universitetinde ilimiy saparda boldı. Ózbekstannıń 7 joqarı oqıw orınları, atap aytqanda Qaraqalpaq mámleketlik universiteti hámde Evropa Awqamınan Italiyanıń Politecnico di Torino, Portugaliyanıń Universidade de Evora hámde Ispaniyanıń Universidad Politecnica de Madrid universitetleri menen birgelikte baslanǵan joybardıń ashılıw máresimi (Kick-off meeting) hám usı jılǵa rejelestirilgen tómendegi máseleleri dodalandı:

“Quyash energetikası” bakalavlar tálim baǵdarı ushın zamanagóy programmalardı islep shıǵıw;

Innovaciyalıq laboratoriyalardı hám oqıw orayların shólkemlestiriw;

Basqarıw hám sapanı jaqsılaw;

Joybardıń turaqlılıǵı, baylanıs, jańalıqlar hám dizayni;

Finanslıq basqarıw mashqalaları.

Ushırasıw dawamında hár bir universitettiń usı tarawdaǵı tájiriybeli alımlarınıń prezentaciyaları tıńlanıp, qatnasıwshılar ózleriniń qızıqtırǵan sorawlarına juwaplar aldı. Joybar sheńberinde ótkerilgen 3 kúnlik seminar sońında qatnasıwshılar sertifikatlar hám bahalı sawǵalar menen sıylıqlandı.