Jası úlken kekse áwlad wákilleriniń bay turmıslıq tájiriybesi barlıq waqıtta da jaslar ushın biybaha ibrat mektebi bolıp kelgen. Usı tiykarda búgin 7-fevral kúni Berdaq atındaǵı Qaraqalpaq mámleketlik universitetinde Jańa Ózbekstan ushın» súreni astında «Úsh áwlad» ushırasıwı bolıp ótti. Ushırasıwda Nuranıylar Keńesi baslıǵı T.Abdijapparov, Qaraqalpaqstan Respublikası Ishki isler ministrliginiń nuranıy aqsaqalı, general M.Babaniyazov, Ámiwdárya” jurnalı redaktorı, shayır X.Dáwletnazarov hám de jaqın aymaqlardaǵı óziniń ómir jolı menen turmıslıq tájiriybesi kópke úlgi nuranıy ustaz professor-oqıtıwshılar menen oqıwda hám jámiyetlik jumıslarda belsendi bolǵan student jaslar qatnastı. Ushırasıwda universitet rektorı akademik A.Reymov ashıp berdi. Ol óz shıǵıp sóylewinde mámleketimizde sońǵı jılları ámelge asırılıp atırǵan reformalar, bilimlendiriw tarawındaǵı ózgerisler, sonday-aq, elimizde ámelge asırılıp atırǵan social-ekonomikalıq reformalardıń túp mazmunı insan hám onıń máplerin qorǵawǵa, hár bir insanǵa óz potencialın júzege shıǵarıwǵa qaratılǵanlıǵı haqqında aytıp ótti.
Ushırasıwda sózge shıqqanlar jaslarımızǵa óz ómir jolları, dóretiwshilik jumısları, mashaqatlı miynetlerdiń arqasında usınday dárejelerge jetiskenlikleri haqqında hám búgingi kúnde jaslarǵa jaratılıp atırǵan imkaniyatlardan nátiyjeli paydalanıp, keleshekte jetik insanlar bolıp jetilisiw boyınsha ózleriniń másláhát hám keńeslerin berdi.
Haqıyqatında da mámleketimiz basshısınıń alıp barıp atırǵan tuwrı siyasatı sebepli Ózbekstandaǵı barlıq millet hám xalıqlar wákilleri awızbirshilikli, óz-ara tatıwlıqta jasap, janajan Watanımızdıń rawajlanıwı jolında nátiyjeli miynet etip atırǵanı, hámme birdey mámleketimiz itibarında bolıp atırǵanı, jaslardı, mine, usınday dástúrler ruwxında kamalǵa keltiriw búgingi kúnniń áhmiyetli wazıypası bolıp tabıladı.
Ilaj dawamında kekse áwlad wákilleri hám belsendi jaslarımızǵa estelik sawǵaları taǵsırıldı. Ilajda ózbek, qaraqalpaq, qazaq, túrkmen, rus hám basqa da xalıqlardıń milliy jır hám qosıqları atqarılıp, ushırasıw qatnasıwshılarına ózgeshe zawıq baǵıshladı. Bunnan soń, Berdaq atındaǵı Qaraqalpaq mámleketlik universiteti rektoratı tárepinen kekse áwlad wákilleri, nuranıy ustazlarǵa bayram dasturxanı jayılıp, olarǵa húrmet kórsetildi.
QMU baspasóz xızmeti
