Búgin 10-fevral kúni Berdaq atındaǵı Qaraqalpaq mámleketlik universiteti Ximiya-texnologiya fakulteti «Ximiyalıq texnologiya» kafedrası tayanısh doktorantları hám magistrantları menen universitet rektorı, akademik A.Reymov ushırasıw ótkerdi.

Ushırasıwdan tiykarǵı maqset magistrantlar hám doktorantlardıń alıp barıp atırǵan ilimiy jumıslarınıń barısı, olardıń mashqalaların úyreniw, sonday-aq, dissertaciya jumısınıń áhmiyeti onıń nátiyjesi haqqında pikir alısıw bolıp tabıladı.

Dáslep, rektor A.Reymov Organikalıq emes zatlar ximiyalıq texnologiyası qánigeligi doktorantlarınıń házirgi kúnge shekem alıp barǵan jumısları menen tanıstı hám olardıń úsh jılǵa belgilengen rejede ilimiy izertlewlerdiń múddetinde orınlanıwı ushın jaratılǵan imkaniyatlar haqqında aytıp ótti. Tájiriybede alınǵan maǵlıwmatlardı ilimiy jurnallarda maqala hám tezisler kórinisinde tayarlaw hám olardı Scopus, Web of Science sıyaqlı indeksaciyalanǵan jurnallarda hámde Ózbekstan Respublikası Joqarı attestaciya komissiyasınıń dizimine kirgizilgen jurnallarda járiyalaw boyınsha kórsetpe hám túsinikler berdi.

Bunnan soń, A.Reymov Ximiyalıq texnologiya kafedrasındaǵı magistrantlar menen jeke sáwbetlesiw ótkerip, olardıń ilimiy temaları hám dissertaciya jumıslarınıń qay dárejede ekenligi haqqında, hám de olardaǵı mashqalalar boyınsha hár magistrantlar menen jeke sáwbetlesiw alıp bardı. Májilis sońında magistrantlardıń ilimiy basshılarına hám tiyisli juwapkerlerge tapsırmalar berildi.