Tártip intizam hám juwapkershilikti kúsheytiw, jınayatshılıqtıń aldın alıw ortalıǵın bekkemlew – huqıqbuzarlıqlar profilaktikası nátiyjeliliginiń tiykarǵı faktorı bolıp esaplanadı.
Usı jıldıń 15-fevral kúni 7-sanlı oqıw imaratında oqıytuǵın, avtomobil basqarıwshı student-jaslar arasında jınayatshılıq hám huqıqbuzarlıqtıń aldın alıw, oǵan qarsı gúresiw hám de olar arasında profilaktikalıq úgit-násiyatlaw jumısların alıp barıw maqsetinde «Avtotransport hádiyseleriniń aldın alıw» atamasında profilaktikalıq úgit-násiyatlaw ilajı ótkerildi.
Ilajǵa Dene mádeniyatı fakulteti jaslar menen islesiw boyınsha dekan orınbasarı R.Óteniyazov, Tariyx fakultetiniń jaslar menen islesiw boyınsha dekan orınbasarı Q.Najimov, Geografiya hám tábiyiy resurslar fakultetiniń jaslar menen islesiw boyınsha dekan orınbasarı N.Ganiev, QR IIM JHQB aǵa inspektorı B.Zinelbaev, QMU profilaktika inspektorı, mayor I.Erejepov, Arxitektura fakulteti oqıtıwshıları M.Kamalov, D.Najenov, tyutorlar hám student-jaslar qatnastı.
Ilajda bayanatshılar Ózbekstan Respublikası Ministrler Kabinetiniń 2022-jıl 12-aprel kúngi “Jol háreketi qaǵıydaları haqqında”ǵı 172-sanlı qararı, Ózbekstan Respublikası Ministrler Kabinetiniń 2022-jıl 26-aprel kúngi “Bilimlendiriw mákemelerinde Jol háreketi qaǵıydaları boyınsha úgit-násiyat jumısların kúsheyitiw is-ilajları haqqında”ǵı 212-sanlı qararı, Ózbekstan Respublikasınıń 2024-jıl 19-yanvar kúngi “Jol háreketi haqqında”ǵı 900-sanlı nızamınıń mazmun-mánisi, sonday-aq, urlıq islew, qumar oynaw, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, diniy ekstremizm, jınısıy qatnas hám qospashılıq, kiberjınayat, pirotexnika ónimlerin paydalanıw yamasa satıw, hár túrli náshebentlik, psixotrop zatlardı paydalanıw, satıw yamasa satıp alıw sıyaqlı jınayatlardıń awır aqıbetleri haqqındaǵı túsiniklerdi anıq faktler menen keltirip ótti.
Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
