Búgin 1-mart kúni Berdaq atındaǵı Qaraqalpaq mámleketlik universitetinde Ózbekstan xalıq xudojnigi, reńli súwret ustası, Ózbekstan Kórkem óner akademiyası akademigi, Ózbekstan Kórkem akademiyası baslıǵı, Nuriddinov Akmal Vahobovich penen ushırasıw keshesi bolıp ótti. Keshege Qaraqalpaqstan xalıq xudojnigi, Ózbekstan Kórkem óner akademiyasınıń haqıyqıy aǵzası, akademik Sarsenbay Baybosınov, Ózbekstan Kórkem óner akademiyası Qaraqalpaqstan bóliminiń baslıǵı Ulbosın Utegenova, Ózbekstan Kórkem óner akademiyasınıń aǵzası, jaslar ustazı Barlıqbay Aytmuratov, sonday-aq, universitettiń Kórkem óner fakulteti professor-oqıtıwshıları, student-jasları qatnastı.
Dáslep ilaj universitettiń Kórkem óner fakulteti professor-oqıtıwshıları, student-jasları tárepinen túrli tematika hám janrlarda dóretken kartinalarınıń kórgizbesi menen baslandı. Ushırasıwdı universitet rektorı A.Reymov alıp bardı hám qatnasıwshılarǵa xudojniktiń dóretiwshiligi haqqında keń túrde maǵlıwmatlar berdi. Bunnan soń, Ózbekstan xalıq xudojnigi Akmal Nuriddinov sózge shıǵıp óziniń ómir jolı, dóretiwshilik miynetleri haqqında jıynalǵanlarǵa aytıp ótti. Ushırasıw keshesinde qatnasıwshılar kewilli sáwbetler qurıp, ózlerin qızıqtırǵan sorawların pikir-usınısların bildirdi. Sáwbetlesiw barısında belgili xudojnik Akmal Nuriddinov student-jaslardıń pikir-usınısların esapqa alıp, aldaǵı waqıtları, Qaraqalpaqstan Respublikasında óziniń jeke kórgizbesin shólkemlestiriw, sonday-aq, reńli súwret salıwǵa qızıǵıwshı jaslar ushın sheberlik sabaqların shólkemlestiriwdi maqset etkenin aytıp ótti.
Maǵlıwmat ushın; Nuriddinov Akmal Vahobovich 1959-jıl 27-fevralda Namangan wálayatında tuwılǵan. Maǵlıwmatı joqarı Ózbekstan Kórkem óner akademiyası akademigi (1997), Ózbekstan xalıq xudojnigi (2003), Mámleket sıylıqı laureati (2001), «Pidayılıq xızmetleri ushın» ordeni iyesi (2019 ). Yaponiya imperatorınıń «Shıǵıp atırǵan quyash ordeni”, “Altın nurlı moyın qayısı» ordeni menen sıylıqlanǵan (2024). Akmal Nuriddinovtiń dóretiwshiligi jaqsılıq hám jawızlıq, jaqtılıq hám qaranǵılıq temaları boyınsha óz kartinalarında sáwlelengen.
QMU baspasóz xızmeti
