Aldın xabar bergenimizdey, usı jıldıń 24-fevral kúni Baxreyn mámleketiniń Manama qalasında qılıshpazlıq sportı boyınsha Aziya chempionatı ótkerilip, chempionatta Ózbekstan saylandı komandası sıylı l orındı iyeledi. Ózbekstan saylandı komanda quramında Berdaq atındaǵı Qaraqalpaq mámleketlik universiteti Dene mádeniyatı fakulteti 2-kurs studenti Gúlistan Perdebaeva da qatnastı.

Búgin 2-mart kúni Qaraqalpaq mámleketlik universitetinde Aziya chempionı Gulistan Perdebaeva menen ushırasıw bolıp ótti. Onda professor-oqıtıwshılar, student-jaslar qatnastı. Ushırasıwdı universitet rektorı A.Reymov basqarıp bardı.

Ol óz shıǵıp sóylewinde, Húrmetli Prezidentimizdiń sport tarawına degen ayrıqsha itibarı, tarawdıń materiallıq-texnikalıq bazasın bekkemlew, olardı hár tárepleme qollap-quwatlawdı kúsheytiw maqsetinde alıp barılıp atırǵan reformaları, álbette, tarawdıń rawajlanıwına, ásirese student jaslarımızǵa keń múmkinshilik jaratılǵanlıǵın aytıp ótti hám Gúlistan Perdebaevanıń qolǵa kirgizgen jetiskenligi menen qutlıqlap, aladaǵı oqıwlarında tabıslar tiledi.

Bunnan soń,  Aziya chempionı Gulistan Perdebaeva sózge shıǵıp, óziniń sportqa kirip keliwi, ondaǵı qıyınshılıqları, qolǵa kirgizgen jetiskenlikleri haqqında jıynalǵanlarǵa sóylep berdi. Ushırasıw dawamında student-jaslar ózleriniń qızıqtırǵan sorawlarına juwaplar aldı.

Haqıyqatında da Húrmetli Prezidentimiz baslaması menen mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Sonlıqtan da Bunday jaratılǵan imkaniyatlardan universitetimiz student-jasları aqılǵa muwapıq paydalanıp, solardan olimpiada qatnasıwshısı, jáhán chempionı, Aziya chempionı, Ózbekstan chempionları jetilisip shıqtı. Bunın ayqın mısalı retinde universitetimizdiń maqtanıshı Gúlistan Perdebaevanıń sporttaǵı jetiskenliklerin aytıp ótiw orınlı.

QMU baspasóz xızmeti