Aldın xabar bergenimizdey, Tashkent qalasıda Xalıqaralıq Vestminister universitetinde «Ózbekstan- Ullı Britaniya bilimlendiriw forum»ınıń ekinshi kúni dawam etpekte. Forum sheńberinde universitet rektorı A.Reymov Britaniyanıń jáne bir universiteti- Reading universiteti wákili professor Devid Karter menen ushırastı hám universitetler arasında qatnasıqlardı jolǵa qoyıw imkaniyatları haqqında sóylesiwler alıp bardı.

Sáwbet barısında rektor A.Reymov Reading universiteti wákiline universitetttegi bilimlendiriw, ilimiy izertlew jumısları; professor-oqıtıwshılar, ilim izertlewshiler, studentler ushın jaratılǵan qolaylıqlar haqqında maǵlıwmat berip ótti. Óz náwbetinde, Professor D.Karter Reading universitetinde bilimlendiriw sisteması, tiykarǵı jetiskenlikler, ásirese, ilim izertlew orayları haqqında aytıp ótti.

Ushırasıw sońında, tárepler gumanitar hám tábiyiy pánler baǵdarlarında birge islesiw hám universitetler arasında tuwrıdan tuwrı ushırasıwlar shólkemlestiriwge kelisip alındı.

Maǵlıwmat ushın: Reading Universiteti QS reytingi boyınsha dúnya júzinde Top-200 universitetler qatarına kiredi, hám de THE reytingi boyınsha 201-250- orında turadı. Bul universitet 50 den artıq ilim-izertlew orayların óz ishine aladı.