Búgin Ózbekstan- Ullı Britaniya Forumınıń ekinshi kúni dawam etpekte. Forumnıń 4-sessiyası teması Transmilliy bilimlendiriw tendenciyaları (TBT) hám rawajlanıwı, Ózbekstan- Ullı Britaniya TBT sherikliginiń tiykarǵı baǵdarları: Ózbekstan- Ullı Britaniya TBT sherikligi hám xalıqaralıq bilimlendiriwdi Ózbekstan joqarı bilimlendiriw sistemasın jánede rawajlandırıwdaǵı ornı haqqında boldı. Sessiya barısında TBTnıń joqarı bilimlendiriwde tutqan ornı boyınsha global kóz-qaraslar, TBT nı rawajlandırıwdaǵı imkaniyatlar hám qıyınshılıqlar talqılandı.
Forum sheńberinde Qaraqalpaq mámleketlik universiteti rektorı A.Reymov Britaniyanıń Norwich Til bilimi institutı wákili direktor orınbasarı Mayk Rayley menen ushırastı. Ushırasıw barısında tárepler universitetler arasındaǵı óz-ara qatnasıqlar, sheriklik, bilimlendiriw, atap aytqanda, shet tillerdi oqıtıw hám rawajlandırıw boyınsha sóylesiwler alıp barıldı. Norwich universiteti hám Qaraqalpaq mamleketlik universiteti arasında akademikalıq baylanıslardı bekkemlew hám rawajlandırıw, universitet professor -oqıtıwshıların tayarlaw hám qayta tayarlaw baǵdarında birge islesiwdi, sonıń menen birge, tárepler ortasında óz-ara baylanıslardı rawajlandırıwdı óz ishine alatuǵın shártnama imzalandı.
Maǵlıwmat ushın: Norwich Til bilimi institutı (NILE- Norwich Institute of Language Education) ingliz tilin oqıtıw boyınsha dúnyadaǵı eń iri bilimlendiriw hám rawajlandırıw institutlarınıń biri bolıp tabıladı. 1995-jılda shólkemestirilgen NILE házirge shekem 60 tan artıq mámleketten 50 000 nan artıq oqıtıwshılardıń ingliz tili boyınsha qısqa qánigelik kurslarında tájiriybelerin asırǵan. Ullı Britaniya hám dúnya júzlik onlayn oqıw kursların usınıwdan tısqarı, NILE bilimlendiriwdi reformalaw boyınsha keń kólemli joybarlardı islep shıǵıw hám ámelge asırıwda belsendi qatnasıp kelmekte.
