Búgin 19-mart kúni Xalıq deputatları Keńesiniń jumıs nátiyjeligin arttırıw hám óz-ara tájiriybe almasıw maqsetinde Buxara wálayatınıń Xalıq deputatları wálayat hám qala rayonlıq Keńesi deputatları Qaraqalpaqstan Respublikasında saparda boldı.

Sapar dawamında miymanlar Berdaq atındaǵı Qaraqalpaq mámleketlik universitetinde bolıp, bul jerde Buxara wálayatınan kelip oqıp atırǵan bir qatar student-jaslar menen ushırastı.

Dáslep miymanlardı universitettiń oqıw isleri boyınsha prorektorı O.Dúysenbaev kútip alıp, universitetimizdegi oqıw processler, student-jaslarǵa jaratılǵan sharayatlar, sonday-aq, búgingi kúnde universitette Buxara wálayatınan kelip oqıp atırǵan studentler haqqında maǵlıwmatlar berip ótti.

Bunnan soń, miymanlar ushın universitetimiz quramındaǵı «Repressiya qurbanların eslew» muzeyine sayaxat shólkemlestirildi. Bul jerde miymanlar muzeyde jıynalǵan tariyxıy eksponatlar menen tanısıp, olardıń muzeyde orın alǵan ózine tán tarıyxı hám kelip shıǵısları menen jaqınnan tanısıp, ata-babalarımızdan qalǵan tariyxiy estelikler, olardıń ótmishleri haqqında jańa maǵlıwmatlar alıwǵa eristi. Ushırasıwda Qaraqalpaqstan Respublikası Joqarǵı Keńesiniń komitet baslıǵı Sh.Ótemisov hám Nókis qalalıq Keńesiniń deputatları qatnastı.