Búgin 19-mart kúni Al-Farabi atındaǵı Qazaq milliy universiteti ximiya-texnologiya fakulteti kafedra baslıǵı A.Alımbaeva hám usı kafedranıń orınbasarı G.Saparovalar Berdaq atındaǵı Qaraqalpaq mámleketlik universitetinde miymanda boldı. Miymanlardı universitet ilimiy isler hám innovaciyalar boyınsha prorektorı I.Turdimambetov, professor O.Muratbaevna, xalıqaralıq bólim baslıǵı hám xızmetkerleri kútip aldı.
Ushırasıwda dáslep tárepler bayram tileklerin bildirip, ózleriniń universitetleri haqqında maǵlıwmatlar almastı. Bunnan soń, universitet prorektorı I.Turdımambetov miymanlar menen ilimiy-izertlew baǵdarları, laboratoriya imkaniyatları, universitettiń materiallıq texnikalıq bazası haqqında sáwbetlesiwler alıp bardı. Onda tárepler studentler, doktorantlar hám jas professor-oqıtıwshılar almasıw, sonday-aq, Al-Farabi universitetine jas alımlarımızdı tájiriybelerin asırıw ushın jazǵı mektep hám ilimiy stajirovkaǵa jiberiw, sonıń menen birge, ámeldegi kelisim shártnamaların keńeytiw tiykarında birge islesiwlerdi rawajlandırıw máselelerin kórip shıqtı.
Maǵlıwmat ushın: Al-Farabi atındaǵı Qazaq milliy universiteti QS reytingında dúnya júzi boyınsha 230-orında, Aziya universitetleri arasında 44- orında, hám de Orta Aziya universitetleri arasında 29-orında turadı.
