Búgin Berdaq atındaǵı Qaraqalpaq mámleketlik universitetinde «Álem nurǵa tolsın seniń menen, Nawrız!» súreni astında bayram ilajı bolıp ótti. Onda Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, milliy oraylardan wákiller, universitettiń professor-oqıtıwshıları, student-jaslar hám bir qatar miymanlar qatnastı. Dáslep, bayram ilajın universitet rektorı A.Reymov ashıp berdi hám jıynalǵanlardı úlkemizge kirip kelgen jańalanıw hám jasarıw, dóretiwshilik hám jaratıwshılıq áyyamı –Nawrız” ulıwma xalıqlıq bayramı menen universitet jámááti atınan qızǵın qutlıqladı.
Ol óz shıǵıp sóylewinde Nawrız bayramı bul mudamı saǵınıp kútetuǵın hám úlken quwanısh- shadlıqlar menen belgilenetuǵın, biz ushın-ómir máńgiligi, tábiyattıń sheksiz saqıylıǵı, milliy úrip-ádet hám dástúrlerimizdiń tákirarlanbas táriypi ekenligin aytıp ótti. Sonday-aq, Húrmetli Prezidentimizdiń «Joqarı bilimlendiriw mákemelerinde ilimiy potencialdı jáne de arttırıw, ilimiy hám ilimiy-pedagog kadrlar tayarlaw kólemin keńeytiw eń áhmiyetli máselelerden biri», dep atap ótkenindey usınday bayram kúnlerinde jámáátimiz jetiskenlikleri haqqında ayrıqsha maqtanısh penen atap ótti.
Ilajda Qaraqalpaqstan Respublikası Joqarǵı Keńesiniń komitet baslıǵı T.Romanov sózge shıǵıp, jıynalǵanlardı bayram menen qızǵın qutlıqladı. Bunnan soń, bayramǵa tán sán-saltanat penen bezelgen sahnada qosıqlar jańlap, úrp-ádet hám dástúrlerimizge say sahnalıq kórinisler jıynalǵanlar názerine usınıldı. Bayram ilajı dawamında miymanlar universitet fakultetleri tárepinen tayarlanǵan milliy taǵamlar menen bezetilgen dástúrxanlar átirapında jaslar menen ushırasıp, qazan átirapına jámlesip ulıstıń ullı kúni Nawrız bayramında xalqımızǵa tınıshlıq, tatıwlıq, awızbirshilik tilep, jaqsı niyetler menen súmelek taǵamın bılǵadı.
Haqıyqatında da, Nawrız” ulıwma xalıqlıq bayramın universitet jámááti, ásirese student-jasları milliy kiyimler menen átirapqa ózgeshe sán berip, bir ananıń perzentlerindey bekkem awızbirshilik penen bayramdı múnásip belgilemekte. Ilaj dawamında hár qıylı tańlawlar sport jarısları ótkerilip, talantlı jaslar tárepinen milliy úrp-ádet, dástúrler, ayaq-oyınlar milletler aralıq tatıwlıqtı jırlaytuǵın qosıqlar atqarıldı hám jıynalǵanlarǵa bayram keypiyatın inám etti.
QMU Baspasóz xızmeti
