Usı jıldıń 1-aprel kúni “1-aprel – Xalıq-aralıq quslar kúni” múnásibeti menen Qaraqalpaq mámleketlik universitetiniń Biologiya fakultetinde Ózbekstan qusların qorǵaw jámiyetiniń Qaraqalpaqstan filialı hám “Otus”-studentler ornitologiyalıq klubı tárepinen shólkemlestirilgen «Tuwalaq – Ózbekstannıń jıl qusı» atamasındaǵı ilimiy seminar bolıp ótti. Seminarǵa student jaslar, professor-oqıtıwshılar, Ózbekstan Ekologiyalıq partiyası Qaraqalpaqstan Respublikası partiya shólkemi, Qaraqalpaqstannıń qorǵalatuǵın tábiyiy aymaqlarınan “Qubla Ústirt milliy tábiyat baǵı”, “Aral boyı milliy tábiyat baǵı” hám “Sudoche-Akpetki landshaft buyırtpa qorıqxanası” inspektorları hám ilimiy xızmetkerleri, mektep oqıwshıları, sonday-aq ǵalaba xabar quralları wákilleri qatnastı.
Yakub Ametov ilimiy seminardı ashıp berdi hám “quslar kúni” niń kelip shıǵıw tariyxı, quslardıń áhmiyeti hám olardı qorǵaw máseleleri boyınsha keń túrde túsinik berdi. Bunnan soń, Ózbekstan qusların qorǵaw jámiyetiniń atkarıw komiteti aǵzası, QMU Biologiya fakulteti professorı, biologiya ilimleri doktorı Muratbay Jumanov hám Ózbekstan Ekologiyalıq partiyası Qaraqalpaqstan Respublikası partiya shólkemi baslıǵı Aysanem Begimovalar ilimiy seminar qatnasıwshıların “1-aprel – Xalıq-aralıq quslar kúni” menen qutlıqlaw ushın sózge shıqtı.
QMU Ulıwma biologiya hám fiziologiya kafedrası doktorantı, «Otus-studentler ornitologiyalıq klubı» baslıǵı, PhD Islambek Arepbaev ««Tuwalaq – Ózbekstannıń jıl qusı» atamasında, QMU tayanısh doktorantı Quralbay Turdıbaev «Qaraqalpaqstan Respublikasınıń siyrek ushırasatuǵın qusları hám olardı qorǵaw» atamasında, Bozataw rayonı Aralboyı milliy tábiyat baǵı ilimiy isler qánigesi Muratbay Shamshetdinov «Aralboyı milliy tábiyat baǵı qusları» atamasında, Qubla Ustyurt milliy tábiyat baǵı ilimiy isleri boyınsha direktor orınbasarı Sultanbek Tleumuratov «Qubla Ústirt milliy tábiyat baǵı faunası» atamasında, QMU, Biologiya qánigeligi magistrantı «Otus-studentler ornitologiyalıq klubı» lideri Izetulla Tursınbaev «Quslarǵa tásir etiwshi ekologiyalıq faktorlar» atamasında, QMU, Biologiya tálim baǵdarı 3-kurs ctudenti, «Otus-studentler ornitologiyalıq klubı» aǵzası Sarbinaz Bauetdinova «Siz bilesizbe?» atamasında bayanatlar qılıp qızıqlı maǵlıwmatlardı berdi.
Sonıń menen birge, Biologiya fakulteti studentleri hámde mektep oqıwshıları arasında «Tuwalaq – Ózbekstannıń jıl qusı» atamında súwret salıw boyınsha tańlaw bolıp ótti. Studentler hámde mektep oqıwshıları bir-birinen ájayıp hám mánili suwretlerdi salıw menen birge bul qusqa dónip turǵan qáwip-qáterler, olardı asırap-abaylaw hám qorǵaw mashqalaları haqqında sóylep berdi. Tańlaw jeńimpazları Biologiya fakulteti Otus-studentler ornitologiyalıq klubı, Ózbekstan Ekologiyalıq partiyası Qaraqalpaqstan Respublikası partiya shólkemi hám de “Aral boyı milliy tábiyat baǵı” qorıqxanası tárepinen tayarlanǵan sawǵalar menen sıylıqlandı. Tádbir júdá qızıqlı hám mazmunlı ótti.
Respublika masshtabında ótkerilgen bul tádbir úlken áhmiyetke iye bolıp, onıń tiykarǵı maqseti – xalıqtıń tábiyat hám quslar haqqında bilimin asırıw, quslardıń jasaw ornın qorǵaw, pútkil dúnyada jabayı tábiyattı saqlap qalıw mashqalalarına adamlardıń dıqqatın qaratıw hámde quslar mısalında tábiyattıń pútkil biologiyalıq kóptúrliligin áwladlarımızǵa jabayı halında jetkerip beriw bolıp tabıladı.
Islambek Arepbaev
QMU, Ulıwma biologiya hám fiziologiya kafedrası doktorantı,
«Otus-studentler ornitologiyalıq klubı» baslıǵı, PhD
