Ózbekstan hám Malayziya mámleketleri arasında barlıq tarawlarda birge islesiw jaqsı jolǵa qoyılǵan. Sol qatarı, bilimlendiriw tarawındaǵı birge islesiwdi ayrıqsha aytıp ótiw orınlı. Bunıń ayqın mısalı retinde, Berdaq atındaǵı Qaraqalpaq mámleketlik universiteti Malayziyanıń Linkoln kolleg universiteti menen qospa tálim dástúri tiykarında birge islesiw boyınsha shártnama tiykarında búgingi kúnde birge islesiwdi ámelge asırıp kelmekte.

Qaraqalpaq mámleketlik universiteti studentleri universitette 2 jıl dawamında tálim alıp, házirgi waqıtta Linkoln kolleg universitetinde oqıwın dawam etiriw ushın Malayziyaǵa keldi. Usı jıldıń 4-aprel sánesinde Linkoln kolleg universiteti prezidenti Amiya Bhaumik penen ushırasiw bolıp ótti hám bul ushırasıwda shet tilleri fakulteti Dj. Kurbanbaev hám xalıqaralıq birge islesiw bóliminen Sh.Shaniyazovlar qatnastı. Ushırasıwda birge islesiwdi, atap aytqanda, akademiyalıq mobillikti jánede jedellestiriw, professor-oqıtıwshılardı Linkoln kolleg universitetine jiberiw, studentler almasıw, birgelikte maqalalar tayarlawdı jolǵa qoyıw sıyaqlı bir qatar kelisimlerge kelindi.