Ózbekstan Respublikası Prezidentiniń 2018-jıl 5 iyun kúngi PQ-3775-sanlı qararında kórsetilgen shet elli alımlar menen oqıw, ilimiy hám ilimiy – pedagogikalıq baylanıslardı kúsheytiw maqsetinde búgingi kúnde Berdaq atındaǵı Qaraqalpaq mámleketlik universitetinde bir qansha ilajlar ámelge asırlmaqta. Usı tiykarda búgin 24-aprel kúni Qazaqstan Respublikası K.İ.Satpaev atındaǵı Qazaq Milliy izertlew texnika universiteti injenerlik tarawı laboratoriyası baslıǵı docent Azat Seytxan hám usı laboratoriyanıń jetekshi ilimiy xızmetkeri, docent Baymenov Aljan Juldasovichlar universitetimizde miymanda boldı. Dáslep miymanlardı universitettiń jaslar máseleleri hám ruwxıy-aǵartıwshılıq isleri boyınsha prorektor S.Alawatdinov hám Ximiya-texnologiya fakulteti dekanı B.Nurımbetovlar kútip alıp, birgelikte sáwbetlesiwler alıp bardı. Birge islesiw jumıs barısında miymanlar Organikalıq hám organikalıq emes ximiya kafedrası professor – oqıtıwshıların ximiya iliminiń jetiskenlikleri menen tanısıw, sonday-aq, jas oqıtıwshılardıń doktorlıq dissertaciya (PhD) jumısları boyınsha másláhátler beriw hám fakultet studentlerine sabaq ótiw rejelestirilgen.
