Ózbekstan Respublikası Ilimler akademiyasınıń haqıyqıy aǵzalarınıń 2024-jılǵa belgilengen is-rejelerinde mámleketimizde ámelge asırılıp atırǵan reformalardıń mazmun-mánisin orınlarda keń túrde úgit násiyat ilajların ótkeriw názerde tutılǵan.
Usı tiykarda 25-aprel kúni Berdaq atındaǵı Qaraqalpaq mámleketlik universiteti Ekonomika fakultetinde Ózbekstan xalıqaralıq islam akademiyası professorı, akademik Nurislom Tóxliev penen ushırasıw bolıp ótti. Onda fakultettiń professor-oqıtıwshıları, kafedra baslıqları hám student-jaslar qatnastı.
Ushırasıwdı fakultet dekanı K.Kudiyarov alıp bardı hám ushırasıw qatnasıwshılarına akademik Nurislom Tóxlievtıń ómir jolı, ekonomika tarawında alıp barıp atırǵan ilimiy-izertlew jumısları, sonday-aq bul baǵdarda qolǵa kirgizip atırǵan nátiyjeleri haqqında aytıp ótti.
Bunnan soń, akademik N.Tóxliev sózge shıǵıp, búgingi kúnde elimizde bilimlendiriw tarawında ámelge asırılıp atırǵan reformalar, ilimiy izertlew jumıslar hám ilim jolınıń mashaqatları, sonıń menen birge “Kreativ ekonomika” haqqında ushırasıw qatnasıwshılarına maǵlıwmatlar berdi. Ushırasıwda qatnasıwshılar ózleriniń qızıqtırǵan sorawlarına juwaplar aldı.
