Usı jıldıń 29-aprel kúni Berdaq atındaǵı Qaraqalpaq mámleketlik universitetinde Ximiya ilimleriniń kandidatı, docent M.Ismailovtıń 80 jıllıq yubileyine bagıshlanǵan eslew keshesi bolıp ótti. «Onda bir qatar miymanlar, prorektorlar, professor-oqıtıwshılar, nuraniy ustazlar hám student-jaslar qatnastı. Ilajdı universitettiń ilimiy isler hám innovaciyalar boyınsha prorektorı I.Turdımambetov ashıp berdi hám jıynalǵanlardı óz xalqına sadıqlıq, pidayılıq penen xızmet etiwdi baxıt dep bilgen kóplegen jaslardıń ustazı, óz isiniń haqıyqıy pidayısı bolǵan insan Muartbay Ismailovtıń 80 jıllıq yubileyi menen universitetimiz jámááti atınan qızǵın qutlıqladı. Bunnan soń sózge shıqqanlar tárepinen bul insannıń ómir jolı, ilimiy-izertlew jumısları, ximiya ilimlerin rawajlandırıw baǵdarında qolǵa kirgizgen nátiyjeleri, ilim jolınıń mashaqatları hám tabısları haqqında jıynalǵanlarǵa maǵlıwmatlar berildi.
Maǵlıwmat ushın; Ximiya ilimleriniń kandidatı, docent Muratbay Ismailov 1944-jılı 18 –martta Shımbay rayonında tuwılǵan. 1960-jılı orta mektepti tamamlaǵannan soń Qaraqalpaq mámleketlik pedagogikalıq institutınıń ximiya-biologiya qánigeligine oqıwǵa kiredi. Bul instituttı 1965-jılı tabıslı tamamlaǵannan soń, miynet jolın Qaraqalpaq mámleketlik pedagogikalıq institutınıń zoologiya kafedrasında úlken laborant bolıp islewden baslaydı.
M.Ismailov 4 avtorlıq guwalıqtıń, 40 dan artıq sabaqlıq, oqıw qollanba hám de oqıw-metodikalıq jumıslardıń avtorı. M.Ismailov zaman talabına sáykes joqarı oqıw orınlarınıń studentleri, akademiyalıq licey hám kásip-óner kolledjleri oqıwshıları ushın oqıwlıq hám metodikalıq qollanbalar tayarlaǵan.
M.Ismaylov 2000-jıllardan baslap ómiriniń aqırına deyin Qaraqalpaqstandaǵı kóshpe qumlar haqqında hám kóshpe qumlardı irkiw usılların izlep tabıw hám ámelge asırıw qumlı zonalardı ózlestiriwdiń eń túpkilikli hám áhmiyetli máseleleri boyınsha ilmiy izleniwler alıp bardı.
Usı orında óz isiniń haqıyqıy pidayısı bolǵan insan M.Ismailovtıń 80 jıllıq yubileyi menen universitetimiz jámááti atınan qızǵın qutlıqlaymız! Ustazımızdıń talapshańlıǵı, pidayılıǵı, onıń islegen qayırlı isleri, biziń qálbimizde máńgi saqlanıp qaladı.
QMU baspasóz xızmeti
