Ózbekstan Qaharmanları, shayır hám jazıwshı, Ibrayım Yusupov hám de Tólepbergen Qayıpbergenovlardıń 95 jıllıǵı múnásibeti menen, sonday-aq, Ózbekstan Respublikası Sport ministrligi, Ózbekstan Respublikası Joqarı bilimlendiriw, ilim hám innovaciyalar ministrligi, Ózbekstan studentler sport associaciyası, Ózbekstan Respublikası Jaslar isleri agentligi, Ózbekstan kurash federaciyasınıń qospa qararına muwapıq usı jıl 2-may kúni universitet student-jasları arasında sporttıń milliy kurash túri boyınsha Qaraqalpaq mámleketlik universiteti birinshiligi ótkerildi.
Jarısqa universitet studentlerinen ibarat 150 ge shamalas palwanlar (eresekler: 60,66,73,81,+81, qızlar: 52,57,63, +63 salmaq kategoriyasında) qatnastı. Jarıs qızǵın bellesiwlerge bay bolıp, jaslardıń milliy kurash sport túrine bolǵan qızıǵıwshılıǵı, olardıń sport sheberlikleri sınaldı. Jarısqa tájiriybeli sportshılar, dene mádeniyatı teoriyası hám metodikası kafedrası oqıtıwshıları R.Xolekov, S.Qaniyazov, A.Alxamovlar tóreshilik etti. Jarıs tóreshiler tárepinen ádil bahalanıp, belgilengen salmaq kategoriyalarındaǵı jeńimpazlar anıqlandı. Sonday-aq, jarıs jeńimpazları shólkemlestiriwshiler tárepinen tayarlanǵan diplomlar hám qımbat bahalı sawǵalar menen sıylıqlandı.
Ótkerilgen jarıstıń tiykarǵı maqseti studentler arasında sporttıń milliy kurash túrin jáne de rawajlandırıw, student-jaslar arasında salamat turmıs tárizin qáliplestiriw, universitet kóleminde bul sport túrin ǵalabalastırıw hám en jaydırıw, olardıń sport sheberligin asırıw, qábiletli sportshı studentlerdi anıqlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
