Birlesken milletler shólkemi Bas Assambleyasınıń 1993-jılǵı qabıl etilgen rezolyuciyasına kóre, 1994-jılldan baslap hár jılı 3-may – Jáhán baspasóz erkinligi kúni sıpatında keń túrde belgilenip kelinbekte. Usı sáne múnásibeti menen universitetimizde de saltanatlı ilaj ótkerildi. Onı Qaraqalpaq filologiyası hám jurnalistika fakulteti dekanı Q.Turdıbaev basqarıp bardı. Ilajda sózge shıqqan Jurnalistika kafedrası baslıǵı J.Marziyaev ótkerilip atırǵan bayramnıń áhmiyetine hám usı jılı universitette yaǵnıy Qaraqalpaqstanda jurnalistika tálim baǵdarınıń ashılǵanına 40 jıl tolıp atırǵanın, usı kúnge shekem jámiyetimizdiń kópshilik salalarına jetik maman qánigelerdi tárbiyalap shıǵarıp atırǵanın, pitkeriwshilerdiń basım kópshiligi búgingi kúni óz kásibiniń pidayısı bolıp xızmet etip atırǵanın, miynetleri arqasında mámleketimizdiń sıylıqlı ataqlarına iye bolıp atırǵanın, ayırımları bolsa mámleketlik basqarıw uyımlarında juwapkershilik lawazımlarda islep atırǵanın, tálim baǵdarında oqıp tálim alıp atırǵan studentlerden bolsa kópshiligi mámleketimizdegi student-jaslarǵa beriletuǵın ataqlı stipendiya hám basqa da tańlawlardıń jeńimpazları bolıp atırǵanın, atap aytqanda usı kúnge shekem tálim baǵdarında úsh «Prezident stipendiyası» jeńimpazı, úsh «Zulfiya» atındaǵı mámleketlik sıylıq laureatları bar ekenin, bunnan basqa «Nawayı», «Berdaq», «Tólepbergen Qayıpbergenov» stipendiyaları hám basqa da tańlawlardıń jeńimpazları bolıp kiyatırǵanın maqtanısh penen tilge alıp ótti.
Sonday-aq ilajda sózge shıqqan bir qatar jası úlken ustazlar tálim baǵdarınıń basıp ótken jollarına názer tasladı. Sonıń menen birge bayramnıń áhmiyeti, jámiyette baspasóz erkinliginiń tutqan ornı, sóz erkinliginiń sóz, insan, hújdan erkinligi sıyaqlı siyasiy huqıqlardan biri ekenligi, baspasózdiń erkin xızmet kórsetiwin, insanlardıń baspasózde óz pikir hám sezimlerin tosqınlıqsız bildire alıwdı kórsetetuǵınlıǵın ayırıqsha atap ótti.
Jáne atap ótiwimiz kerek, bul ilajǵa bunnan 30 jıl aldın pitkergen pitkeriwshiler de qatnasıp, bayram Diydarlasıw bayramına da ulasıp ketti. İlajda bul pitkeriwshiler de sózge shıǵıp, ózleriniń miynettegi mol tabısların maqtanısh penen tilge alıp ótti. Toparınıń bul jetiskenliklerin ózinde jámlegen kitabın ilaj qatnasıwshılarına sawǵa retinde tapsırdı.
Bayram múnásibeti menen Shomanay rayonı hákimi B.Yangiboev bayram qutlıqlawın jolladı, onı rayon hákimi orınbasarı oqıp esittirdi, qutlıqlawda jurnalistlerdiń respublika xalqınıń turmısındaǵı máselelerdi óz waqtında ǵalaba xabar qurallarında sáwlelendirip barıp atırǵanı hám olar óz sheshimin tawıp atırǵanı, álbette bunday iygilikli islerdiń negizinde universitettiń jurnalistika tálim baǵdarınıń ornı ayırıqsha ekeni atap ótildi, bunnan bılay da olardıń jumıslarına tabıslar tiledi, sonday-aq rayon hákimiyatı tárepinen tayarlanǵan bayram sawǵasın saltanatlı túrde tapsırdı.
Sonıń menen birge usı ilajda bayram múnásibeti menen tálim baǵdarı janında jumıs alıp barıp atırǵan «Jas jurnalistler» klubı tárepinen shólkemlestirilgen «Eń, eń, eń» atamasındaǵı dóretiwshilik tańlawı jeńimpazların sıylıqlaw máresimi de ótkerildi. Onda student-jaslar hár qıylı janrda tayarlaǵan maqalaları menen qatnasıp, tańlaw shártlerine bola óz materialların ǵalaba xabar qurallarında sáwlelendirip barǵan maqalaları menen qatnastı.
Ilaj qatnasıwshılarda úlken tásir qaldırdı.
«Jas jurnalistler» dógeregi
