Sociolog ózi kim?

Sociologlar-bul statistikalıq hám anketa maǵlıwmatların analizlew tiykarında siyasiy, ekonomikalıq, sociallıq hám ruwxıy-aǵartıwshılıq tarawındaǵı keleshekte kútilip atırǵan mashqalalar hám olardıń sheshimlerin hám jámiyettegi waqıyalar rawajlanıwın boljay alatuǵın qánigeler. Sociologlar reklamadan tartıp demografiyaga shekem hár túrli sociallıq hádiyselerge qánigelesken.

Sociolog jámiyette qanday xızmetti atqaradı?
Sociologtıń tiykarǵı quralları sociologiyalıq izertlewlerdiń hár túrli usılları (soraw, maǵlıwmatlardı analizlew, tájiriybe, sociologiyalıq baqlaw, ekspert bahalaw usılı hám basqalar). Qánige olardıń járdemi menen sociallıq hádiyselerdi túsintiredi hám baqlawlar tiykarında baǵdarlamalar islep shıǵadı, usınıslar tayarlaydı, jámiyet máselelerin sheshiw boyınsha joybarlardı islep shıǵadı.

Sociolog joqarı dárejede izertlew metodologiyasi, maǵlıwmatlardı qayta islew baǵdarlamasına iye, itimallıq teoriyası, statistika hám hátte diskret matematika boyınsha bilimlerge iye bolıwı talap etiledi. Filosofiya, logika, tariyx-bul professional sociolog jaqsı biliwi kerek bolǵan pánler. Anglichan tilin biliw de paydalı boladı : shet ellik kásiplesler menen tájiriybe almaslaw hesh qashan artıqshalıq etpeydi.
Sociologlar qay jerde isley aladı?
Kásiplik potencialdı eki baǵdarda — ilimiy hám ámeliy sociologiyada ámelge asırıw múmkin. Ilimiy jumıslar jazıw, jurnallarda baspa qılıw, hár túrli dárejedegi konferenciyalarda shıǵıp sóylew jas sociologti kútip atır. Marketing izertlewleri, reklama iskerligi, ǵalaba xabar quralları, PR agentlikleri, sociologiyalıq xızmetler menen shuǵıllanatuǵın kompaniyalar da maman sociologlarǵa mútáj. Bunday qánigediń tiykarǵı waziypası puqaralardıń ekonomikalıq, siyasiy yamasa sociallıq máseleler haqqındaǵı pikirlerin úyreniw hám analiz qılıw, sonıń menen birge, belgili bir lawazımǵa saylawlar waqtında saylawshılar kandidatlar haqqında qanday pikirde ekenligin biliw bolıp tabıladı.
Berdaq atındaǵı Qaraqalpaq mámleketlik universitetiniń pitkeriwshileri bolǵan sociologlar házirde Nókis qalasındaǵı 17-sanlı mektepte mektep oqıwshıları, ásirese pitkeriwshi klass oqıwshıları menen kásipke baǵdarlaw boyınsha izertlew jumısların alıp barmaqta. Bul bolsa qánigelik studentleriniń teoriyalıq bilimlerin ámeliyatta bekkemlew ushın úlken bir imkaniyat sıpatında qaraymız.

Sultanbergenov Islambek