Elimizde 9-may – «Eslew hám qádirlew kúni» múnásibeti menen hár jılı urıs qatnasıwshıları hám front artı miynet veteranları halınan xabar alıw dástúrge aylanǵan. Usınday ilajlardıń biri Dene mádeniyatı fakulteti tyutorları hám studentleri tárepinen ámelge asırıldı. Yaǵnıy olar Nókis qalasında jasawshı urıs qatnasıwshısı Qádirbay ata Nurmanovtıń shańaraǵına barıp veteran atamızdıń halınan xabar aldı. Xabar alıwshılar veteran atamızdı «Eslew hám qádirlew» kúni ulıwma xalıqlıq bayramı menen, sonday-aq, ekinshi jer júzilik urısta fashizm ústinen erisilgen jeńistiń 79 jıllıǵı menen qızǵın qutlıqladı hám bayram sawǵaların tapsırdı. Veteran ata pátiyasın berip, student-jaslarǵa óz aqıl násiyatların aytıp, oqıwlarında tabıslar tiledi.

 

Bayram sheńberinde tyutorlar hám studentler-jaslar  paytaxtımızda jaylasqan «Hásiretli ana» esteligine barıp, urısta qaza bolǵanlardı eske aldı hám de olardıń esteligine gúller qoydı. Jaslar bul jerde ekinshi jer júzilik urısta jeńiske erisiwde úlken áhmiyetke iye bolǵan hám de búgingi kúndegi zamanagóy áskeriy texnikalardıń kórgizbeleri menen tanıstı.