Usı jıldıń 11-may kúni Xojeli rayonı  aymaǵında jaylasqan «Gáwir qala» tariyxıy kompleksinde «Mádeniy miyrasqa meniń úlesim!» atamasındaǵı Respublikalıq akciyası sheńberinde ilaj bolıp ótti. Akciya Qaraqalpaqstan Respublikası Mádeniy miyras basqarması hám Berdaq atındaǵı Qaraqalpaq mámleketlik universiteti menen birgelikte shólkemlestirildi. Student jaslar tariyxıy komplekstiń átirapında abadanlastırıw jumısların alıp bardı.

Akciyanı ótkeriwden maqset – respublikamız aymaǵında jaylasqan tariyxıy-mádeniy miyras esteliklerin saqlaw, olardı keleshek áwladlarǵa jetkeriw hám úgit-násiyatlawdan ibarat. Akciya dawamında Arxeologiya kafedrası oqıtıwshıları t.i. boyınsha PhD docent w.a A.Alimbetov  ham PhD docent O.Qdirniyazov qatnasıwshılarǵa «Gáwir qala» kompleksiniń tariyxı, onı asırap-abaylaw haqqında maǵlıwmat berdi.

Jáne de student jaslar menen Xojeli rayonında jaylasqan Mizdakxan arxeologiyalıq kompleksindegi Nazlımxan sulıw, Shamun Nabiy hám Gáwir qala arxeologiyalıq esteliklerinde zıyaratta boldı.

Zıyarat júdá qızıqlı hám jańa maǵlıwmatlarģa bay boldı. Joqarı oqıw orınlarında shólkemlestiriletuģın usınday ilajlar studentlerdiń tuwılǵan jer hám Ana Watanģa degen muhabbatın jáne de asırıw menen birge, tariyxıy orınlar saqlanıp qalıwına hám olardı qorģawģa úlesin qosadı desek qátelespegen bolar edik. Akciyaǵa Tariyx fakulteti dekanınıń Jaslar máseleleri boyınsha orınbasarı Q.Najimov, fakultet tyutorları B.Esemuratova, G.Esboganova, 1-kurs studentleri hám ǴXQ wákilleri qatnastı.

Uluǵbek Xojaniyazov

1-A tariyx studenti