Ata-babalarımızdı eslew, olardıń iygilikli islerin dawam ettiriw – biz ushın qarız hám parız. Bul jolda bizge muzey janlı tariyx gúwası sıpatında ruwxıy azıq beredi. Búgin 15-may kúni “18-may – Xalıqaralıq muzeyler kúni” múnásibeti menen Repressiya qurbanların eslew muzeyinde Tariyx fakultetiniń 1-kurs studentleri hám fakultet tyutorları qatnasıwında “Muzey eksponatları janlı tariyx” atamasında ruwxıy-aǵartıwshılıq ilaj ótkerildi. Ilajdı Tariyx fakulteti dekanınıń Jaslar máseleleri boyınsha orınbasarı Q.Najimov alıp bardı.

Muzey direktorı, t.i.k.docent A.Qudiyarov hám Arxeologiya kafedrası docenti t.i. boyinsha PhD A.Alimbetovlar shıǵıp sóylep, bul muzeyde jazıqsız qurban bolǵan Qaraqalpaqstanlı mámleketlik ǵayratkerler, ruwxıy aǵartıwshılıq jolında pidayılıq kórsetken xalqımız perzentleriniń xızmetlerin sáwlelendiriwshi tariyxıy eksponatlar haqqında aytıp ótti. Bunnan soń jıynalǵanlarǵa Tariyx fakulteti 4-kurs studentleriniń “18-may Xalıqaralıq muzeyler kúni”ne baǵıshlap tayarlaǵan “Saxnalıq kórinisi” qoyıp berildi. Ilaj sońında qatnasıwshılar Kórkem óner fakulteti studentleri tárepinen tayarlanǵan «1930-1950-jıllardaǵı repressiyalıq siyasat» atamasındaǵı jas súwretshilerdiń kórgizbesi hám muzey eksponatların tamashaladı.

Baxıtgúl Esemuratova,
Qaraqalpaq mámleketlik universiteti
Tariyx fakultetiniń tyutorı.