Ózbekstan Respublikası Prezidenti Sh.Mirziyoyevtıń tapsırması tiykarında Joqarı oqıw orınlarında xızmet kórsetip atırǵan professor-oqıtıwshılar, doktorantlar erkin izleniwshilerdiń ilimiy islenbelerin qollap-quwatlaw maqsetinde joqarı oqıw orınlarına respublikadaǵı bank basshıları biriktirilgen edi. Usı múnásábet penen innovaciyalıq ideyalar, startaplar hám ilimiy joybarlardı bizneske aylandırıwǵa kómeklesiw maqsetinde sawda bankleri tórepinen joqarı oqıw orınlarında alımlar, taraw qánigeleri menen ushırasıwlar ótkerilmekte. Búgin 18-may kúni Qaraqalpaq mámleketlik universitetinde universitetke biriktirilgen Ózbekstan Respublikası Xalıq banki baslıǵı orınbasarı S.Rasulov menen Zoom platforması arqalı universitet professor-oqıtıwshıları, doktorantlar hám jas alımlar ortasında ushırasıw shólkemlestirildi.
Ushirasıwdı universitet Ilimiy isler hám innovaciyalar boyınsha prorektorı I.Turdimambetov ashıp berdi hám basqarıp bardı. Ushırasıw qatnasıwshıların búgingi ilajdan gózlengen tiykarǵı maqset hám wazıypalar menen tanıstırıp ótti. Ushırasıwda professor-oqıtıwshılardan b.i.d (DSc), professor T.Júginisov, t.i.f.d (PhD), docent A.Mambetsharipova, “Elektr energetikası” kafedrası stajor-oqıtıwshısı Q.Uzakbaev hámde studentler jaslardan Matematika fakulteti 3-basqısh studenti A.Duysenbaev, Biologiya fakulteti 3-basqısh studentleri A.Tadjimov, T.Shamuratovlar óz ilimiy hám startap joybarları menen shıǵıp sóylep, usı joybarlar tiykarında keleshekte óz aldılarına qoyǵan maqset hám wazıypaları haqqında keńnen túsinik berdi.
Bunnan soń, Ózbekstan Respublikası Xalıq banki baslıǵı orınbasarı S.Rasulov shıǵıp sóylep, usınıs etilgen barlıq joybarlarda aktual máseleler kóterip shıǵılǵanlıǵın, bul joybarlar hújjetlerin bank juwapkerleri menen birgelikte úyrenip shıǵılatuǵınlıǵın hám qollap-quwatlanatúǵınlıǵın hám de keleshekte de usı máseleler boyınsha birge islesiwge tayar ekenligin bildirip ótti. Ushırasıw kóterińki ruwxta, ózara erkin pikirlesiwlerge bay tárizde ótkerildi hám barlıq qatnasıwshılar ózleri qızıqtırǵan sorawlarına tiyisli juwapların aldı.
