Ózbekstan Milliy universitetinde Italiya, AQSh, Ázerbayjan, Rossiya, Qazaqstan, Qırǵızıstan hám Qaraqalpaqstannan jetekshi ilimpazları qatnasıwında “Jurnalistika hám ǵalabalıq kommunikaciyalar XXI ásirde: rawajlanıw tendenciyaları, tálim hám texnologiyalar” temasında xalıqaralıq ilimiy-ámeliy konferenciya ótkerildi. Onda Berdaq atındaǵı Qaraqalpaq mámleketlik universiteti professor-oqıtıwshılarınan M.Jumamuratova, Z.Orazımbetova, T.Masharipova J.Marziyaevlar qatnastı.

– Ózbekstan Milliy universitetiniń 106 jıllıǵı munasábeti menen ótkerilgen bul konferenciyada tiykarǵı itibar jurnalistika, publicistika, kommunikaciya, jasalma intellekt, media, jámiyetshilik menen baylanıslar, dizayn, media sawatlılıq, reklama hám media lingvistika tarawlarında alıp barılıp atırǵan ilimiy izertlewlerge keń jámiyetshilik dıqqatın qaratıw hám Oraylıq Aziya mámleketlerindegi jurnalistika tálim mákemeleri ortasındaǵı birge islesiwdi bekkemlew máselelerine baǵıshlandı.

Ilimiy-ámeliy konferenciya dawamında sózge shıqqanlar, jurnalistika hám ǵalabalıq kommunikaciyalar salasındaǵı jańa bilim hám tájiriybelerdi almasıw, jańa texnologiyalardı engiziw búgingi operativ dáwirdiń zárúrli wazıypası ekenligi aytıp ótti.