Jizzax politekxnika institutında Ózbekstan Respublikası prezidentiniń 2019-jıl 23-maydaǵı «Qurılıs materialları sanaatın rawajlandırıwǵa baylanıslı qosımsha is-ilajlar haqqında» ǵı PQ-4335-sanlı hám «Jaslar hám bisnesti qollap-quwatlaw jılı» programmasındaǵı kórsetilgen wazıypalardı orınlaw maqsetinde 2024-jıl 18-may kúni qurılıs tarawı ushın kadrlar tayarlawshı JOO arasında «Ilim qarlıǵashları-2024» 3-xalıqaralıq simpoziumı bolıp ótti. Xalıqaralıq simpoziumda ilimiy-texnikalıq konferenciya hám studentlerdiń ilimiy jumıslar tanlawı da shólkemlestirilgen bolıp, onda jámi 8 nominaciyadan 6 nominaciya boyınsha qatnasqan Qaraqalpaq mámleketlik universiteti Qurılıs fakulteti studentleri 4 nominaciya boyınsha:
– «Zamanagóy qurılıs materialları, buyımları hám konstrukciyaları tiykarında joybarlanǵan eń jaqsı energiya tejemli imarat» nominaciyası boyınsha 1-orın 2-kurs studenti Bayram Reymov;
– «Jergilikli shiyki zatlar tiykarında jaratılǵan eń jaqsı qurılıs materialları hám konstrukciyaları» nominaciyası boyınsha 3-orın 2-kurs studenti Aziz Najimov;
– «Mineral hám ximiyalıq qosımshalardan paydalanıp jaratılǵan jańa áwlad betonları, qurılıs materialları hám konstrukciyaları» nominaciyası boyınsha 3-orın 1-kurs studenti Beksultan Bekmuratov;
– «Sanaat shıǵındıları tiykarında jaratılǵan eń jaqsı qurılıs materialları hám konstrukciyaları» nominaciyası boyınsha 3-orın 3-kurs studenti Arman Turganbaevlar jeńimpaz bolıp diplom hám estelik sawǵaları menen sıylıqlandı.
Jánede 4-kurs studenti Q.Dauletmuratov hám 3-kurs studenti A.Alimovlar óz nominaciyaları boyınsha belsene qatnasqanı ushın qáwender «Knauf» qospa kárxanasının ayrıqsha sertifikatı hámde estelik sawǵaları menen sıylıqlandı. Studentlerdi tanlawǵa tayarlaǵan ilimiy basshıları docent A.Purxanatdinov, O.Aytjanov, D.Berdaxov hám B.Xojabergenovlar. Studentlerimizdiń bul jetiskenlikleri ilim jolındaǵı dáslepki qádemi hám bul dawamlı bolıwın hámde keyingi ilimiy jumıslarında tabıslar tilep qalamız…