Geyde waqıttıń júdá tez ótip ketkenligin sezbey qalamız. Kimler menendur, tuwrıraǵı jan dúnyası, kózqarası ózara jaqın insanlar menen sáwbetlesiw biziń ruwxımızǵa azıq baǵıshlap, keypiyatımızdı kóteredi. Jıllar dawamında kitaplardan alalmaǵan bilim hám tájireybeni, jigerlendiriwdi jaqsı qánigeler, alımlar, shayır-jazıwshılar, dóretiwshi kásip iyeleri menen bolǵan bir-eki saatlıq sáwbetlerden alıwımız múmkin. Sol ushın da jaslardıń jasıúlken áwlad wákilleri menen ushırasıwların shólkemlestiriwde tereń máni bar. Jaslarda kúsh-jiger, talpınıs, qızıǵıwshılıq kúshli, jasıúlkenlerde bolsa uzaq jıllar dawamında mol bilim, aqıl hám bay tájireybe toplanǵan. Qashan usı eki áwladtaǵı qábiletlerdi birlestire alsaq, kámil insanlar jetilisip shıǵarı anıq. Elimiz boylap ótkerilip atırǵan «Aǵartıwshılıq tarqatıp» joybarı ózinde áynen usınday iygilikli maqsetlerdi jámlegeni menen áhmiyetli.
Ózbekstan Respublikası Prezidenti Administrasiyasınıń 2024-jıl 13-apreldegi 03-RA 1-5357-sanlı tapsırması hám Ózbekstan Respublikası Joqarı bilimlendiriw, ilim hám innovaciyalar ministrliginiń 2022-jıl 17-aprel kúngi 122-sanlı buyrıǵınıń orınlanıwın támiyinlew maqsetinde Berdaq atındaǵı Qaraqalpaq mámleketlik universitetiń qaraqalpaq filologiyası ham jurnalistika fakulteti «Jurnalistika» kafedrasınıń bir qansha professor-oqıtıwshıları 22-may kúni Kegeyli rayonındaǵı 9-sanlı qánigelestirilgen ulıwma bilim beriw mektebinde miymanda boldı.
– Biz qábiletli jaslarımız benen maqtanamız, – deydi mektep direktorı S.Mamutova. – Sebebi olar etken miynetimizdiń jemisi sanaladı. Oqıwshılarımızdıń qolǵa kirgizgen kishkene jetiskenligi artında muǵállimlerdiń úlken miyneti bar. Hár jılı pitkeriwshilerimizdiń 80 payızdan aslamı joqarı oqıw orınlarınıń studenti bolmaqta. 2018 jılı «Jas kitapqumar» tańlawınıń Respublikalıq basqıshında jeńimpaz bolıp, Prezident sawǵası “Spark» avtomobilin jeńip alǵan qızımız Kokanova Nursulıw mine bıyıl Zulfiya atındaǵı mámleketlik sıylıqqa múnásip tabıldı. Bunıń hámmesi kitaptı dos tutınıwdıń, tınımsız izleniwdiń nátiyjesi dep oylaymız. Házirde qızımız universitet talabası. Hám bizlerdiń, hám sizlerdiń teńleslerine, jaslarǵa úlgi etip kórsetetuǵın maqtanıshımız.
Haqıyqatında da jaslardı ozıq oylı, bilimli qánige etip táriyalawda oqıw orınlarınıń birgelikte, bir jan, bir tán bolıp háreket etiwi áhmiyetli. Ushırasıw barısında oqıwshılardıń ózleri qızıqqan mamanlıq boyınsha universitettegi qaysı jónelislerge tapsırıw múkinligi haqqındaǵı sorawları, jazǵan maqala hám qosıqların oqıp berip, pikirlerimizdi biliwge qızıqqanlıǵı bizdi júdá quwandırdı. Olardıń kópshiligi ingliz tilinde erkin sóylese aladı. Mekteptegi qaraqalpaq tili hám ádebiyatı, shet tilleri pánleri muǵállimleriniń poeziya shaydaları ekenligin olardıń qáleminen dóregen qosıqlarınan bildik. Biziń bolajaq jurnalistimiz 7 klass oqıwshısı Abatniyazova Húrliman “Qaraqalpaq xaliq ertekleri” telegramm kanalın júrgizedi. Kishkene bolsa da, bilim úlesiwge at salısıp atırǵan qońırawday jaǵımlı hawazǵa iye qızımızdıń kanalına aǵza bolsańız, perzentlerińiz, aqlıqlarıńız ushın qaraqalpaqsha audio erteklerdi tabasız. Reti kelgende jaqsı nárselerdi de reklama etip keteyik dedik-dá.
Jurnalistika kafedrası oqıtıwshıları Z.Qojıqbaeva, M.Temirbaevalar óz sózinde Kegeyliden júdá kóp alım, shayır, dóretiwshiler, el aǵaları jetilisip shıqqanlıǵın jarqın mısallar menen keltirip ótti. Berdaq babamızdıń “Men maǵrifat izler edim” dep jazǵanınday hár bir insan tuwılǵanınnan baslap kitap penen joldas bolsa ruwxıy dúnyası bay, kreativ pikirlewshi, jańa nárselerdi oylap tabıwshań bolıwın uqtırdı.
Shınında da watanǵa sadıqlıq, insaniyatqa muhabbat, kásipke pidayılıq kibi ullı tuyǵılar joqarı mánawiyatlı qáliblerde tuwıladı. Joqarı mánawiyat negizi –bilimde. Kóp aytılıp sıyqası shıǵıp ketken aqıl-násiyatlar bolsa da, biz onı qayta-qayta aytıwdan sharshamawımız kerek. Sebebi jaqsılıq ta, jamanlıqta qayta-qayta tákirarlaw arqalı sińdiriledi. Búgingi ayrım qosıqshılardıń aldı-qashtı mánis-mazmunı joq, talǵamsız qosıqları jaslar sanasın uwlap atırǵanı kibi…
Qullası, ushırasıw ózara pikir almasıwlarǵa bay, auditoriya az bolsa da júdá saz ótti. Mektep kitapxanasına jurnalistika kafedrası professor-oqıtıwshılarınıń avtorlıq kitapları sawǵa etildi.
N.Mambetirzaeva
