Berdaq atındaǵı Qaraqalpaq mámleketlik universitetinde Ekonomika ilimleri doktorı, professor, Qaraqalpaqstan Respublikasına xızmet kórsetken ekonomist Q.Ubaydullaevtıń 70 jıllıǵı múnásibeti menen «Aral boyı regionında ekonomikanı rawajlandırıw: mashqalalar tradiciyalar hám innovaciyalar» atamasında respublikalıq ilimiy–ámeliy konferenciya bolıp ótti. Onda Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan Respublikası Ministrler Keńesiniń Baslıǵınıń orınbasarı B.Ótemuratov, Joqarı bilimlendiriw, ilim hám innovaciyalar ministrligi bólim baslıǵı, F. Esonboboev hám qońsı wálayatlardan miymanlar, ilimpazlar, professor-oqıtıwshılar, nuraniylar, student-jaslar qatnastı. Konferenciyanı universitettiń oqıw isleri boyınsha prorektorı O.Dúysenbaev ashıp berdi hám alıp bardı.
Ol óz sozinde házirgi waqıtta, Húrmetli Prezidentimizdin tikkeley baslaması menen, jámiyetimizde ilimniń rolin kúsheytiw, ásirese, akademiyalıq ilimniń abıroyın arttırıw, ilim tarawınıń intellektual potencialın bekkemlew, talantlı jaslardı ilimge keńnen tartıw hám ilim jolında pidákerlik penen xızmet etken alımlardıń mashaqatlı miynetlerin qádirlew mámleketlik siyasatı dárejesine kóterilgenin aytıp ótti. Sonday-aq, bul tarawda barlıq kúsh-jigerin, bilimin hám ilimiy tájiriybesin jaslarǵa ayanbay úyretip kiyatırǵan universitetinde Ekonomika ilimleri doktorı, professor, Qaraqalpaqstan Respublikasına xızmet kórsetken ekonomist Qayrulla Ubaydullaevtıń miynetlerin ayrıqsha maqtanısh penen atap, onıń búgingi múbárek 70 jası menen qutlıqlap konferenciya jumıslarına tabıslar tiledi.
Konferenciyada Qaraqalpaqstan Respublikası Joqarǵı Keńesiniń komitet baslıǵı T.Romanov shıǵıp sóylep, 70 jasqa tolıwı múnásibeti menen Qaraqalpaqstan Respublikası Joqarǵı Keńesi hám Qaraqalpaqstan Respublikası Ministrler Keńesi atınan qutlıqlawın oqıp esittirdi. Bunnan soń, sózge shıqqanlar ustazdıń ómir jolı, ilimiy miynetleri, ilimiy–pedagogikalıq hám jámiyetlik–siyasiy jumıslardaǵı belsendiligi haqqında bayanat jasadı. Haqıyqatında da Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Búgin universitetinde Qaraqalpaqstan Respublikasına xızmet kórsetken ekonomist talapshań hám miyirman ustaz, óz isiniń haqıyqıy pidayısı bolǵan Ekonomika ilimleri doktorı, professor Qayrulla Ubaydullaevatıń 70 jasqa tolǵan yubileyi menen universitetimiz jámááti atınan qızǵın qutlıqlaymız! Ustazǵa bekkem densawlıq, ilimiy-dóretiwshilik jumıslarında tabıslar tilep qalamız.
QMU baspasóz xızmeti
