Sońǵı jılları elimizde hayal-qızlardıń huqıq hám máplerin, gender teńlikti támiyinlew, shańaraq, analar hám de balalardı qorǵaw, hayal-qızlar-arasında isbilermenlikti rawajlandırıw, olar ushın jańa jumıs orınların jaratıw, miynet hám turmıs shárayatların jaqsılaw mámleketimizdiń áhmiyetli wazıypasına aylanǵan hám de bul boyınsha bir qatar reformalar ámelge asırılmaqta. Dene mádeniyatı fakultetinde «Teńles- teńleske» principi tiykarında úgit-násiyatlaw ilajı ótkerildi. Ilajǵa hayal-qızlar máseleleri boyınsha rektor másláhátshisi I.Seytnazarova, fakultet tyutorları hám student-qızlar qatnastı.
Ilajda bayanatshılar Ózbekstan Respublikasınıń “Hayal-qızlarǵa basım ótkeriw hám zorlıq etiwden olardı qorǵaw haqqında”ǵı WRQ-561-sanlı Nızamı, Ózbekstan Respublikasınıń “Hayal-qızlar hám erkekler ushın teń huqıq hám de imkaniyatlar kepillikleri haqqında”ǵı WRQ-562-sanlı Nızamınıń, sonday-aq, hayal-qızlar máselelerine baylanıslı qabıl etilip atırǵan qararlar, pármanlardıń mazmunı hám áhmiyeti, student-qızlar arasında tálim-tárbiya máselesi, elimizde jámiyetke órnek bolıp úlgergen, belgili alım, shayır hám jazıwshı, qaharman hayal-qızlardıń ómir jolı, miynet iskerligi, sonday-aq, ómirdiń ashshı hám dushshı kúnleri, sabırlılıq haqqındaǵı tárbiyalıq másláhátlerin berdi. Ushırasıw qızǵın soraw-juwaplarǵa bay boldı. Bunday ilajlar jaslarımızdıń keleshekte óz ornın tabıwına, milliy mentalitetimizge say hám baxıtlı shańaraq uytqıları bolıwına járdem beriwi sózsiz.
G.Qaniyazova
Dene mádeniyatı fakulteti tyutorı
