Matematika fakulteti «Funkcionallıq analiz, algebra hám geometriya» kafedrası professor-oqıtıwshıları T.Kurbanbaev, T.Kalandarov, A.Alauadinov, A.Seidullaev hám A.Abdireymovler «Máripat taratıp» joybarı tiykarında Moynaq rayonı 11-12-sanlı mektepleri hám Kegeyli rayonı 20-sanlı mekteplerine barıp ilajlar shólkemlestirdi. Dáslep fakultettiń professor-oqıtıwshıları mektep oqıwshıları ásirese, pitkeriwshi klass oqıwshıları menen kásip tańlaw jolları haqqında hám matematika tarawınıń áhmiyeti boyınsha  sáwbetlesiwler alıp bardı. Sáwbetlesiw barısında oqıwshılarǵa zamanagóy matematikanıń jetiskenlikleri, sonday-aq, joqarı bilimlendiriwdegi sońǵı ózgerisler, yaǵnıy Joqarı bilimlendiriw, ilim hám innovaciyalar ministrliginiń belgili qánigelikke ajıratılǵan mámleketlik grantı sheńberinde joqarı ball toplaǵan abituriyent, tańlaǵan joqarı oqıw ornına qaramastan, mámleket grantına usınıs etiliwi jáne mámleket grantı hár jılı joqarı baha alǵan studentler arasında bólinetuǵınlıǵı haqqında aytıp ótildi. Oqıwshılarǵa universitetimiz haqqında maǵlıwmatlar berildi. Matematika tarawı boyınsha bilimlerin jetilistiriw, kitapqa bolǵan qızıǵıwshılıǵın arttırıw maqsetinde kafedra professor-oqıtıwshıları tárepinen shıǵarılǵan kitaplar hám metodikalıq qollanbaların mektep kitapxanasına hám oqıwshılarǵa sawǵa etti.