Búgin 8-iyun kúni Sawda-sanaat palatasınıń májilisler zalında Qaraqalpaqstan Respublikası Prokuraturası tárepinen úsh áwlad ushırasıwı ótkerildi. Onda Prokuratura uyımlarında jıllar dawamında nızam huqıqların támiyinlewde pidayı xızmet etken miynet veteranları, házirgi waqıtta usı tarawda islep atırǵan taraw xızmetkerleri hám Qaraqalpaq mámleketlik universitetiniń student-jasları qatnastı. Dáslep ushırasıwdı Qaraqalpaqstan Respublikası prokurorı E.Tadjiev ashıp berdi hám Húrmetli Prezidentimiz baslaması menen elimizde nuranıylardı qollap-quwatlap, húrmet kórsetiw, olardıń bay turmıslıq tájiriybesin keleshek áwladqa órnek etip kórsetiw baǵdarında bir qansha jumıslar alıp barılıp atırǵanlıǵın aytıp ótti. Bunnan soń, ushırasıwda miynet veteranları ózleriniń ómir jolları haqqında jaslarǵa maǵlıwmat berip, olar menen sáwbetlesip, pikir alıstı. Ushırasıw barısında Berdaq atındaǵı Qaraqalpaq mámleketlik universiteti rektorı A.Reymov sózge shıǵıp, Húrmetli Prezidentimiz basshılıǵında barlıq tarawlarda jańa reformalar ámelge asırılıp atırǵanlıǵı, bunıń nátiyjesinde keleshek iyeleri bolǵan jaslarǵa kóplegen imkaniyatlar jaratılǵanlıǵı, sonday-aq, nuranıylardıń úgit-násiyatları jaslardı kámil insan bolıp jetilisiwine túrtki bolatuǵınlıǵın aytıp, kelgen miymanlarǵa óz minnetdarshılıǵın bildirdi.
Haqıyqatında da, Xalqımızda jası úlkendi sıylaw, jası kishige húrmet-izzet kórsetiw sıyaqlı ájayıp pazıyletler bar. Bunday pazıyletlerge ámel etip, jası úlken, kekse áwlad wákilleriniń turmıs tájiriybesin ózlerine órnek tutqan jaslar ushın búgingi ushırasıw biybaha turmıs mektebi boları sózsiz. Ushırasıw dawamında kelgen miymanlar jaslar ushın kitaplar sawǵa etti. Sonıń menen birge, ushırasıwda Berdaq atındaǵı Qaraqalpaq mámleketlik universitetiniń Kórkem óner fakultetiniń talantlı student-jasları tárepinen miynet veteranlarınıń súwretleri kartinalarǵa túsirilip miymanlarǵa sawǵa etildi.
QMU baspasóz xızmeti
