Qaraqalpaq mámleketlik universiteti quramındaǵı Repressiya qurbanların eslew muzeyi jámááti, tariyx fakulteti professor oqıtıwshıları menen birgelikte muzey ekspoziciyaların bayıtıw, olardı keń jámiyetshilikke tanıstırıw maqsetinde respublikamızdıń qala hám rayonlarına turaqlı túrde ilimiy saparlar shólkemlestirilip kelinbekte. Qaraqalpaq mámleketlik universiteti quramındaǵı Repressiya qurbanların eslew muzeyi direktorı A.Qudiyarov muzey xızmetkerleri A.Alimbetov, B.Keunimjaev, Arxeologiya kafedrası oqıtıwshısı R.Sherniyazovlar usı jılı 14-15 iyun kúnleri Respublikamızdıń qubla aymaǵında jaylasqan, Qaraqalpaqstan Respublikasınıń birinshi paytaxtı Tórtkúl rayonında gezektegi ilimiy saparda bolıp qayttı.
Bunnan aldında yaǵnıy 2024-jılı 19-20 mart kúnleri Nókis qalası Besperde kóshesi 60 jay turǵını, 1934-1938 jılları Qaraqalpaqstan Respublikası ministrler keńesiniń baslıǵı lawazımında islegen “Xalıq dushpanı” tańbası menen jazıqsız qamaqqa alınǵan Qaraqalpaqstan Respublikasınıń mámleketshiligin tiklewge hám onın ekonomikası, sociallıq salaları menen mádeniyatınıń rawajlanıwına óziniń salmaqlı úlesin qosqan el perzenti Jumabay Qurbanovtıń qarındası, Fatima Qurbanovanıń aqlıq balası Berdibaev Dastan Rustamovichtiń shańaraǵında bolıp onıń úy arxivindegi Jumabay Qurbanovqa tiyisli 1930-jıllardaǵı jeke súwretleri, jumıs islegen dáwirdegi yaǵnıy Qızketken (házirgi doslıq) kanalı, Kattaaǵar kanalınıń qurlısı, sol dáwirdegi xalıq xojalıǵınıń jaǵdayın kórsetiwshi súwretlerden nusqalar, Jumabay Qurbanov hám onıń tuwısqanlarınıń turmısı haqqında maǵlıwmatlar jazıp alınıp, sonıń menen birge J.Qurbanovtıń basqada tuwısqanlarınan tariyxımız, muzey ushın maǵlıwmatlar alıw boyınsha baǵdarlar belgilenip alınǵan edi.
Usı jumıslardıń dawamı sıpatında Tórtkúl rayonı Sharap Rashidov kóshesi 75 jayǵa barıp bul mánzilde Jumabay Qurbanovtıń balası Nariman Qurbanovtıń jasaǵanlıǵın, Jumabay hám karındası Patima menen eki tuwısqan bolǵanlıǵı, Jumabay Qurbanovtın ómirlik joldası Gulshad Fazulbaeva 1909-jılı Buxara qalasında tuwılǵanlıǵı, Jumabay Qurbanov 31 jasında repressiyaǵa ushırap, 35 jasında qaytıs bolsada, Tórtkúl rayonında ómiriniń aqırına deyin jasap, rayonlıq emlewxanada akusher ginekolog shıpaker bolıp jumıs islep jas nárestelerdiń den sawlıǵı ushın úlken xızmetler etkenligi, Jumabaydın balası Nariman Qurbanov 1936-jılı tuwılıp, Tórtkúl rayonında haywanlar shıpakeri bolıp jumıs islegenligi, onıń 1990-jıl báhár aylarında qaytıs bolǵanlıǵı, Narimannan bir bala, eki qız bolǵanlıǵı, balası Rustam Qurbanov, qızları Raya hám Dilyafruz Qurbanovalar Tórtkúl rayonı Sharap Rashidov kóshesinde jasaǵanılıǵı haqqındaǵı maǵlıwmatlarǵa iye boldıq. Jáne de sapar dawamında Tórtkúl rayonı, Raxat kóshesi 25-jay turǵını Jumabay Qurbanovtıń aqlıq qızı Raya Abdalovanıń shańaraǵında bolıp J.Qurbanovtıń jeke súwretleri, ol haqqında gazetada baspadan shıqqan maǵlıwmatlardıń nusqası tariyxıy derek retinde alındı.
Bul ilimiy sapar dawamında alınǵan súwret hám hújjetlerler muzey ıqlaspentleri, studentler hám magistrantlardıń qánigelik ámeliyat ótewi hám jas ilimiy xızmetkerler ushın ilimiy derek retinde paydalanıwda úlken tariyxıy áhmiyetke maǵlıwmatlar bolıp esaplanadı.
Baxtiyar Keunimjaev
Muzey xızmetkeri
