Aldın xabar bergenimizdey, Berdaq atındaǵı Qaraqalpaq mámleketlik universiteti Ilimiy isler hám innovaciyalar boyınsha prorektorı prof. I.Turdımambetov bashshılıǵındaǵı delegaciya aǵzaları Qıtay mámleketinde xızmet saparın Sinczyan-uyǵır avtonom rayonındaǵı Qıtay Ilimler akademiyasınıń Sinczyan ekologiya hám geografiya institutında dawam etti. Bul jerde ol usı institut direktorı professor Yuanming Zhang menen ushırasıp sóylesiwler alıp bardı. Ushırasıw barısında eki táreplerdiń keleshekte birge islesiw joybarların belgilep alındı. Bunnan soń, Xalqaralıq birge islesiw bólimi baslıǵı Jianfang Qiao hám de usı institut professorı Alishir Kurban menen ushırasıp, Qaraqalpaq mámleketlik universiteti ushın Sinczyan ekologiya hám geografiya institutında oqıw boyınsha magistratura hám doktorantura basqıshlarına konkurs tiykarında prezidentlik stipendiya hám mámleketlik stipendiya bar ekenligin atap ótip eki tárepleme memorandum tiykarında Qaraqalpaq mámleketlik universitetinen usı konkursqa talabanlardıń tapsırıw múmkinshilikleri bar ekenligin kórsetip ótti. Sonday-aq, usı xızmet saparı dawamında eki tárep birgeliktegi joybarlardı islew boyınsha kelisip aldı hám bul boyınsha GIS laboratoriyası hám Shólge qarsı gúresiw laboratoriyaları ilimiy xızmetkerleri menen Qaraqalpaqstan aymaǵı boyınsha joybarlardı islew ushın ushırasıw ótkeriwdi rejelestirdi. QMU ilimiy isler hám innovaciyalar boyınsha prorektorı professor I.Turdımambetovtiń Sinczyan ekologiya hám geografiya institutındaǵı xızmet saparı dawam etedi.
