Húrmetli Prezidentimiz óz shıǵıp sóylewlerinde búgingi zaman barlıq tarawlar qatarında ilim-pándi de jańa basqıshqa kóteriwdi talap etip atırǵanın, bul jámiyet aldında turǵan aktual máselelerdi ilimsiz sheshiw qıyın ekenin aytıp, usı tarawdı hám ilimpazlardı hár tárepleme qollap-quwatlaw mámleketimizdiń baslı wazıypalarınan bolıp tabıladı degen edi. Haqıyqatında da, mámleket hám jámiyettiń zaman talapları tiykarında rawajlanıwın ilimsiz kóz aldımızǵa keltiriwimiz qıyın.
Usı tiykarda búgin Qaraqalpaq mámleketlik universiteti májlisler zalında Ózbekstan Respublikası Ilimler Akademiyası Qaraqalpaqstan bólimi alımları hám jetekshi ilimiy xızmetkerleri menen ushırasıw bolıp ótti. Ushırasıwdı universitet rektorı, Ózbekstan Respublikası Ilimler Akademiyası Qaraqalpaqstan bólimi baslıǵı A.Reymov ashıp berdi hám basqarıp bardı. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnasıp, búgingi kúnde ÓzR IA Qaraqalpaqstan bólimi ilimpazları, qánigeleri tárepinen ilimiy izertlewler tarawında ámelge asırılıwı kerek bolǵan wazıypalar, Qaraqalpaqstan Respublikasın sociallıq-ekonomikalıq jaqtan rawajlandırıwda ilim hám bilimlendiriwdiń ornı, bul baǵdarda júzege kelip atırǵan mashqalalar hám de olardıń sheshimine qaratılǵan ilimpazlardıń pikirleri hám usınısları tıńlandı.
Ushırasıw dawamında Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev tárepinen Ózbekstan Respublikası Ilimler Akademiyası Qaraqalpaqstan bólimi jumısın ele de rawajlandırıw boyınsha birqatar máseleler kórip shıǵıldı hám bul baǵdarda ilimpazlar aldında turǵan wazıypalar, olardı ámelge asırıw boyınsha tiyisli qánigeler hám ilimiy xızmetkerler tárepinen bildirilgen tiykarlanǵan ámeliy is-ilajlar mámleket tárepinen qollap-quwatlanatuǵınlıǵın atap ótti.
QMU baspasóz xızmeti
