Búgin 14-avgust kúni Berdaq atındaǵı Qaraqalpaq mámleketlik universitetinde Germaniyanıń Munster universiteti wákilleri menen ushırasıw shólkemlestirildi. Onda Qaraqalpaq mámleketlik universiteti xalıqaralıq birge islesiw boyınsha prorektorı T.Nurımbetov, nemis tili kafedrası professor-oqıtıwshıları hám Germaniyanıń Munster universiteti xızmetkerleri Martinez Seekamp, Silvia Reuvekamp, Dr.Bonnighausen Marion, Haas Begisheva Albinalar qatnastı.
Dáslep ushırasıwda universitet xalıqaralıq birge islesiw boyınsha prorektorı T.Nurımbetov universitet haqqında hám ondaǵı jetiskenlikler, Germaniya mámleketi menen birgelikte ámelge asırılıp atırǵan joybarlar haqqında aytıp ótip, kelgen miymanlarǵa universitettiń birge islesiwge tayın ekenin de bildirip ótti. Sonday-aq, ushırasıwda tárepler ortasında birge islesiwdi jolǵa qoyıw, rawajlandırıw hám ilim-izertlew imkaniyatların keńeytiw máseleleri boyınsha sóylesiwler alıp barıldı. Bunnan soń, Munster universitetiniń Xalıqaralıq birge islesiw bólimi baslıǵı hám basqa wákilleri de óz ornında ózleriniń universiteti hám de shet el universitetleri menen, atap aytqanda, Ózbekstandaǵı bir qatar universitetler menen jolǵa qoyılǵan birge islesiw joybarları haqqında maǵlıwmatlar berip ótti. Germaniyanıń Munster universiteti wákilleri Erasmus+ dástúri boyınsha akademik mobillik tiykarında studentler almasıw, ilimiy jumıslarǵa basshılıq etiw, nemis tilin oqıtıw boyınsha professor-oqıtıwshılardıń tájiriybelerin asırıw máselelerinde bir qatar usınısların aytıp ótti. Ushırasıwdıń soraw-juwap bóliminde universitettiń professor-oqıtıwshılar ózleriniń qızıqtırǵan sorawlarına tolıq hám anıq juwaplar aldı. Rásmiy ushırasıw juwmaǵında tárepler óz-ara birge islesiwdi jolǵa qoyıwǵa kelisip alındı.
QMU baspasóz xızmeti
