Búgin 15-avgust kúni Berdaq atındaǵı Qaraqalpaq mámleketlik universitetiniń májilisler zalında Ózbekstan Respublikası Joqarı bilimlendiriw, ilim hám innovaciyalar ministri orınbasarı O.Mahkamov, Qaraqalpaqstan Respublikası Joqarı bilimlendiriw, ilim hám innovaciyalar ministri B.Qayıpbergenov universitet tayanısh doktorantları, óz betinshe izleniwshiler, professor-oqıtıwshılar hám jas alımlardıń qatnasıwında ushırasıw keshesi bolıp ótti.
Ushırasıw májilisin universitet rektorı A.Reymov ashtı hám basqarıp bardı. Dáslep Ózbekstan Respublikası Joqarı bilimlendiriw, ilim hám innovaciyalar ministrligine tiyisli tártipte óz ilimiy izertlew nátiyjelerin ámeliyatqa engiziwge baylanıslı hújjetlerdiń tastıyıqlanǵanlıǵı boyınsha maǵlıwmatnamalar óz iyelerine saltanatlı túrde tapsırıldı. Bunnan soń, Ózbekstan Respublikası Joqarı bilimlendiriw, ilim hám innovaciyalar ministri orınbasarı O.Mahkamov shıǵıp sóylep, sońǵı jıllarda mámleketimizde ilim-pán hám de izertlew jumısları baǵdarında ámelge asırılıp atırılǵan reformalar, usı tarawda engizilip atırılǵan jańalıqlar, sonday-aq, aldaǵı waqıtta ilim-pán hám ilimiy izertlewler salasında bolıwı kútilip atırılǵan ózgerislerge baylanıslı taraw nızamshılıǵındaǵı ayırım jeńillikler haqqında ushırasıw májilisi qatnasıwshıların keńnen tanıstırıp ótti.
Sonıń menen birge, ministr orınbasarı O.Mahkamov tárepinen tayanısh doktorantlar, óz betinshe izleniwshiler, jas alımlar hám professor-oqıtıwshılardıń qızıqtırǵan sorawlarına juwap berilip, olar tárepinen bildirilgen pikir hám usınıslar hár tárepleme kórip shıǵıldı. Ushırasıw sońında Ózbekstan Respublikası Joqarı bilimlendiriw, ilim hám innovaciyalar ministri orınbasarı O.M.Mahkamov tárepinen barlıq izleniwshiler hám tayanısh doktorantlar ushın aldaǵı waqıtta elede jaqın pikirlesiwde, izleniwshilerdiń pikir hám usınısların esitip barıw ushın arnawlı múrájaat platforması iske túsirilgenligin aytıp, barlıq izleniwshilerdi usı bot kanalǵa aǵza bolıwı múmkinligin atap ótti. Ushırasıw májilisi hár tárepleme mazmunlı hám joqarı shólkemleskenlik dárejede bolıp ótti.
QMU baspasóz xızmeti
