Aldın xabar bergenimizdey, usı jıldıń 12-14-avgust kúnleri Tashkent qalasında Mámleket basqarıwı akademiyasında «Saylaw komissiyaları aǵzalarınıń mamanlıǵın arttırıwdı shólkemlestiriw haqqında”gı koncepciyası tiykarında Respublikamızdaǵı jetekshi joqarı oqıw orınları professor-oqıtıwshılarınan dúzilgen trenerler ushın 3 kúnlik oqıw seminarları shólkemlestirildi. Bul oqıw seminarda Berdaq atındaǵı Qaraqalpaq mámleketlik universiteti rektorı A.Reymov basshılıǵında universitettiń Yuridika fakulteti professor-oqıtıwshıları belsene qatnasıp, óz bilimlerin jetilistirdi.
Usı tiykarda 19-avgust kúninen baslap, Berdaq atındaǵı Qaraqalpaq mámleketlik universitetinde Oliy Majlis Nızamshılıq palatası hám jergilikli keńeslerge deputatlar saylawǵa tayarlıq kóriw hám onı ótkeriwge tiyisli jergilikli trenerler ushın 3 kúnlik oqıw ámeliy seminarlar baslap jiberildi. Onda Qaraqalpaqstan Respublikası Oraylıq saylaw komissiyası aǵzası M.Utepbergenov hám joqarı oqıw orınları professor-oqıtıwshılarınan dúzilgen tájiriybeli trenerler qatnaspaqta.
Seminarda dáslep Berdaq atındaǵı Qaraqalpaq mámleketlik universiteti rektorı A.Reymov sózge shıǵıp, saylawdı shólkemlestiriw hám ótkeriw ashıq-aydınlıq principleri tiykarında ámelge asırılatuǵınlıǵı, sonday-aq, saylaw procesi qatnasıwshıları hám jergilikli trenerlerdiń huqıqıy bilimin bekkemlew oǵada áhmiyetli ekenligin aytıp, seminar qatnasıwshılarına keń túrde maǵlıwmatlar berdi.
QMU baspasóz xızmeti
