Búgin 4-sentyabr kúni Berdaq atındaǵı Qaraqalpaq mámleketlik universitetinde Ózbekstan Respublikası Tábiyat resursları ministrligi janındaǵı Qorshaǵan ortalıq hám tábiyattı qorǵaw texnologiyaları ilimiy izertlew institutı wákilleri, sonday-aq, Qıtay Ilimler Akademiyasınıń Sinczyan Ekologiya hám geografiya institutı hám Qıtay Geografiya ilimleri universiteti professorlarınan ibarat delegaciya aǵzaları universitette miymanda boldı.
Sapar dawamında miymanlar Universitet rektorı A.Reymov qabıllawında bolıp, tálim hám ilimiy izertlew salasında jaratılǵan shárt-shárayatlar hám de alıp barılıp atırǵan jumıslar menen keń túrde tanıstı. Bunnan soń, miymanlar universitettiń ilimiy isler hám innovaciyalar boyınsha prorektorı I.Turdımambetov, xalıq aralıq birge islesiw boyınsha prorektorı T.Nurımbetovlar menen birgelikte universitet janındaǵı oqıw hám de ilimiy izertlew laboratoriyaları, bul laboratoriyalarda alıp barılıp atırılǵan izertlew jumısları, oqıw processinde usı laboratoriyalar ásbap-úskenelerinen paydalanıw imkaniyatları haqqında maǵlıwmatlar menen tanıstırıldı.
Sonıń menen, ushırasıw juwmaǵında Ózbekstan Respublikası Tábiyat resursları ministrligi janındaǵı Qorshaǵan ortalıq hám tábiyattı qorǵaw texnologiyaları ilimiy izertlew institutı, Qıtay Ilimler Akademiyasınıń Sinczyan Ekologiya hám geografiya institutı hám Qıtay Geografiya ilimleri universiteti menen kelesi waqıtta tálim, ilim-pán hám isep shıǵarıw integraciyasın elede rawajlandırıw, izertlew jumıslarınıń barlıq baǵdarları, ásirese ekologiya hám qorshaǵan ortalıqtı qorǵaw tarawında birge islesiw boyınsha óz-ara kelisimlerge erisildi.
