Kitap – insaniyattıń eń ullı jetiskenligi, bilim dáregi hám aqıldı jetilistiriwshi qural. Kitaplar arqalı insan dúnyanı úyrenedi, tirishilik filosofiyasın qáliplestiredi hám rawajlanadı. Búgingi kúnde kitap oqıw mádeniyatı insannıń intellektual rawajlanıwı ushın eń áhmietli qurallardan biri bolıp esaplanadı.

Usı tiykarda búgin 12-sentyabr kúni Berdaq atındaǵı Qaraqalpaq mámleketlik universiteti málimleme-resurs orayında 2024/2025 oqıw jılında universitetke birinshi kursqa qabıl etilgen student-jaslar ushın «Qádemiń qutlı kelsin 1-kursım!» atamasında ilaj bolıp ótti. Ilajǵa universitet Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov qatnasıp, studentlerdi baslanıp atırǵan jańa oqıw jılı menen qutlıqladı.

Bunnan soń, Málimleme-resurs orayı direktorı w.w.a. R.Qalmurzaeva málimleme-resurs orayında jaratılǵan imkániyatlarǵa toqtalıp, kórgizbege qoyılǵan kitaplar haqqında kerekli maǵlıwmatlar berip ótti. Ilajda student-jaslar málimleme-resurs orayında jaratılǵan shárayatlar menen keńnen tanısıp, ózlerin qızıqtırǵan sorawlarına juwaplar aldı.

Haqıyqatında da, kitaplar óz ishine tek bilim emes, al insanıylıq qádiriyatlardı da qamtıp alıp, mádeniy miyrastıń bir bólegi sıpatında keleshek áwladlarǵa óz bilimlerin jetkeredi. Kitapqa bolǵan muhabbat hám onı qádirlew – insannıń mádeniy hám intellektuallıq rawajlanıwı ushın zárúr bolǵan qádiriyat. Kitaplar bizge bilim, pikir kólemin keńeytiw hám turmıslıq tájiriybe beredi. Oqıwǵa bolǵan joqarı qızıǵıwshılıqtı qáliplestiriw arqalı biz óz keleshegimizge jol ashamız hám joqarı mádeniyatlı jámiyetti qurıwǵa úles qosamız.

QMU baspasóz xızmeti