Usı jıldıń 11-sentyabr kúni Berdaq atındaǵı Qaraqalpaq mámleketlik universiteti Yuridika fakultetinde «Sudya hám student-jaslar» ushırasıwı bolıp ótti.

Onda Qaraqalpaqstan Respublikası Sudınıń ekonomikalıq isleri boyınsha sudyası N.Baltabaeva, Nókis rayonlararalıq hákimshilik sudınıń sudyası Q.Babanazarovlar miymanda boldı. Ushırasıwdı Yurdika fakulteti Jaslar menen islesiw boyınsha dekan orınbasarı B.Ermekbaev kiris sóz benen ashıp berdi.

Dáslep ushırasıwda sudyalar ózleriniń kúndelikli jumıs procesi, sud processleriniń ózine tán tárepleri, nızam ústinligin támiyinlewdegi wazıypaları haqqında student-jaslarǵa aytıp berdi. Ilaj dawamında student-jaslar sud sistemasınıń jumıs processleri haqqında kóbirek maǵlıwmat alıw menen birge, ózlerin qızıqtırǵan sorawlarına juwaplar aldı.

«Bolajaq qánigeler» dógeregi basshısı G.Qazaqbaeva tárepinen shólkemlestirilgen ilaj barısında ustazdıń usınısına bola studentlerdiń teoriyalıq hám ámeliy bilimlerin bekkemlew maqsetinde jaslardıń sabaqtan bos waqtları sud uyımlarına barıp jumıs úyreniwi, tikkeley proceslerde qatnasıw, sudtıń alıp barıw tártibi hám oǵan tayarlıq basqıshların gúzetiw boyınsha ámeliy birge islesiw jumısları alıp barılatuǵın boldı.

Bunday ilajlar yuridika baǵdarında oqıp atırǵan studentler ushın tek ǵana teoriyalıq emes, al ámeliy bilimlerdi keńeytiw imkaniyatın beredi hám keleshektegi kásiplik jumıslarına unamlı tásir kórsetedi.