Búgin 23-sentyabr kúni Berdaq atındaǵı Qaraqalpaq mámleketlik universiteti rektorı A.Reymov fakultetlerdegi oqıw processi menen tanısıw maqsetinde Arxitektura fakultetinde boldı. Dáslep ol jerde professor-oqıtıwshılardıń hám student-jaslardıń sabaq processleri menen tanısıp, bilimlendiriwdiń sapasın arttırıw, sabaqlardı zamanagóy usıllarda alıp barıw hám studentlerdiń ilimiy-dóretiwshilik izleniwlerin qollap-quwatlaw zárúr ekenligin atap ótti.
Sonday-aq, ol oqıw processiniń jáne de nátiyjeli bolıwı ushın tiyisli juwapkerlerge tapsırmalar berdi. Sonıń menen birge, toparlardaǵı student-jaslar menen sáwbetlesip, olardıń bilimlendiriw sapası, oqıw processindegi mashqalaları hám usınısları boyınsha pikirlesip, studentler ózlerin qızıqtırǵan sorawlarına juwaplar aldı.
Bunnan soń, rektor A.Reymov, fakultetlerde jumıs islep atırǵan tyutorlar menen de ushırasıp, student-jaslar arasında jınayatshılıqtıń aldın alıw, olardıń sociallıq jaǵdayların úyreniw hám tálim-tárbiya máselelerine ayrıqsha itibar qaratıw kerekligi, bul boyınsha turaqlı profilaktikalıq sáwbet alıp barıw, olardıń bos waqıtların mazmunlı ótkeriw, universitettegi dógereklerge qamtıw boyınsha tapsırmalar berdi.
Sonday-aq, gúz-qıs máwsimde ijarada jasawshı studentlerdiń jasaw sharayatları menen jaqınnan tanısıp, olardı záhárli gazden abaylı bolıwı hám qáwipsizlik qaǵıydalarına ámel etiw máselelerinde eskertiw, bul boyınsha úgit-násiyat jumısların elede kúsheytiw zárúrligin atap ótti.
Rektor barlıq studentlerdiń qáwipsizligi hám salamatlıǵın támiyinlew maqsetinde bul máselelerge ayrıqsha qatnasta bolıw kerek ekenligin aytıp, fakultet dekanı, dekan orınbasarları hám tyutorlarǵa tiyisli wazıypalardı júkledi. Bunday ilajlar barlıq fakultetlerde dawam etpekte…
QMU baspasóz xızmeti
