Mámleketimizde tálim-tárbiya sistemasın dáwir talapları tiykarında jetilistiriw, jaslarǵa ilim úyretiw hám zamanagóy kásip-ónerlerge baǵdarlaw, olardı ana-Watanǵa sadıqlıq ruwxında tárbiyalawda eń pidayı kásip iyeleri bul álbette–muǵallimler hám ustazlar esaplanadı.

Usı tiykarda búgin 30-sentyabr kúni Berdaq atındaǵı Qaraqalpaq mámleketlik universiteti tárepinen paytaxtımızdaǵı payızlı orınlarınıń birinde 1-oktyabr – Muǵallimler hám ustazlar bayramı múnásibeti menen taraw pidayıları ushın bayram dasturxanı jayıldı. Onda nuraniy ustazlar, professor-oqıtıwshılar hám bir qatar taraw pidayıları qatnastı.

Ilajda universitet rektorı A.Reymov, sózge shıǵıp, jas áwladtıń ruwxıy dúnyası bay, joqarı intellektuallıq potencialǵa iye bolıp kámalǵa keliwinde ayanbay miynet etip atırǵan pidayı kásip iyeleri bolǵan áziz ustazlardı bayram menen qızǵın qutlıqladı.

Bunnan soń, Joqarı bilimlendiriw, ilim hám innovaciyalar ministriniń buyrıǵına tiykar joqarı bilimlendiriw tarawında jumıs alıp barıp, jas áwladtıń sapalı bilim alıwında óziniń pidayı miynetleri menen úlgi bolıp kiyatırǵan, tarawdıń rawajlanıwı ushın óziniń múnásip úlesin qosıp atırǵan bir qatar taraw pidayılarına «Joqarı bilimlendiriw aǵlası» kókirek belgisi saltanatlı túrde tapsırıldı.

Sonday-aq, ilajda bayram múnásibeti menen bir qatar taraw pidayıların, universitetimiz rektoratı hám kásiplik awqam komiteti tárepinen húrmet jarlıqları hám bayram sawǵaları tapsırıldı. Ilaj universitet studen-jaslar tárepinen tayarlanǵan koncert baǵdarlaması menen dawam etti.

Haqıyqatında da, biz búgin zamanagóy bilim hám kásip-ónerlerdi, shet tillerin puqta iyelep, keleshekke úlken úmit hám isenim menen qádem qoyıp atırǵan, erteńgi kúnimizdiń sheshiwshi kúshi bolǵan perzentlerimizdiń kámalında ustazlarımızdıń sheksiz úlesi bar ekenligin ayrıqsha maqtanısh penen atap ótiw orınlı.

QMU baspasóz xızmeti