Qaraqalpaq klassik shayırı Ájiniyaz Qosıbay ulınıń 200 jıllıǵına arnalǵan kesheler tek elimizde emes, al shet ellerde joqarı dárejede ótkerilmekte. Turkiyadaǵı Turkiy xalıqlar Akademiyası baslaması menen basıp shıǵarılǵan «Qaraqalpaq shayırı Ájiniyaz Qosıbay ulı» kitabınıń prezentaciya keshesi 27-sentyabr kúni Ankaradaǵı Hajı Bayram Veli universitetinde bolıp ótti. Keshege Turkiy Akademiyanıń prezidenti Shaxin Mustafaev, Xajı Bayram Veli universitetіnіń rektorı Mexmed Nadji Bostandjı, sonday-aq, tuwısqan turkiy ellerden kelgen diplomatiya tarawınıń wákilleri menen alımları qatnastı.
«Óz shıǵarmalarında túrkiy xalıqlardıń birligin jırlaǵan kórnekli shayır Ájiniyazdıń 200 jıllıǵı qarsańında onıń doretiwshiligin jańlatıwǵa úles qosqanımızdan quwanıshlımız. » — dedi akademik Shaxin Mustafaev óz shıǵıp sóylewinde. – Qaraqalpaqstanda dúnyaǵa kelgen Ájiniyaz tek jergilikli shayır ǵana emes, arab, parsı, qazaq jáne túrkmen tillerin jetik meńgergen oyshıl, lingvist bolǵan. Ol óz shıǵarmalarında túrkiy xalıqlardıń ortaq mádeniy birligin jırlaǵan. Endi onıń dóretpeleri Túrkiy Akademiyasınıń awdarması menen túrk kitap oqıwshılarına jol ashıp otır.” Xajı Bayram Veli universitetіnіń rektorı Mexmed Nadji Bostandjı bolsa, Ájiniyaz Qosıbay ulınıń adamzat tariyxınıń waqıyaları hám ortaq geografiyamızdı jaqınlastıratuǵın bahalılıqları tuwralı qosıqlarǵa iye júdá ullı shayır ekenin atap ótti. Onıń bayan etiwinshe, Ájiniyaz shayır pútkil túrkiy dúnyasına belgili bolıwǵa ılayıq.
Bul keshege Qaraqalpaq mámleketlik universiteti professorı, filologiya ilimleriniń doktorı Quwanıshbay Orazımbetov ta qatnastı hám shıǵıp sóyledi. Kesheniń ashılıw sózinen keyin kitaptı tayarlawǵa úlken úles qosqan Xajı Bayram Veli universitetiniń oqıtıwshısı, docent Xuseyn Yıldırım, Qaraqalpaq mámleketlik universiteti professorı Quwanıshbay Orazımbetov, Ázerbayjandaǵı Atatúrk ortalıǵınıń prezidenti, professor Nizami Kaferovlar shıǵıp sóylep, shayır Ájiniyaz Qosıbay ulınıń ómiri menen doretiwshiligi haqqında maǵlıwmatlar berdi. Keshe Ájiniyaz Qosıbay ulınıń qosıqlarınan oqıw menen juwmaqlandı.
Baxıtbay Paluanov, Qaraqalpaq mámleketlik universiteti docenti
