Hámmeńizdiń xabarıńız bar, Ózbekstan Respublikası Prezidentiniń 2024-jıl 19-iyul kúngi PQ-270-sanlı qararında oktyabr ayınıń birinshi háptesi Respublikamızda Repressiya qurbanların eslew hápteligi dep belgilengen edi. Usı qarar tiykarında universitettiń Repressiya qurbanları esteligi muzeyinde oktyabr ayının birinshi hápteliginiń úshinshi kúninde “Repressiya qurbanları esteligi mángi jasaydı” atamasında Ruwxıylıq hám aǵartıwshılıq Orayı Qaraqalpaqstan bólimi menen birgelikte ilaj ótkerildi. Ilaj qatnasıwshıları dáslep muzeydiń ashılıw tariyxı, muzeyde islenip atırǵan jumıslar, kórkem óner fakulteti jámááti tárepinen qoyılǵan kórgizbesin kóriw menen baslandı. Soń muzeydiń tiykarǵı ekspoziciya zalı menen tanıstı.
Ilajdı universitettiń Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov ashtı ham alıp bardı. Ol óz kiris sózinde 1937-1953-jılları totalitar dúzim tárepinen 100 mıńnan aslam xalqımız wákilleri repressiya siyasatınıń qurbanı boldı. Bul watanlaslarımızdıń 13 mıńı atıp taslanıp, mıńlaǵan adamlar nahaq qulaq etilgen, súrginlerge jiberilgen. Olardıń arasında belgili mámleketlik hám siyasiy ǵayratkerler, ilim wákilleri, dóretiwshi ziyalılar, diniy ulamalar, áskeriy taraw hám sud-huqıq sisteması xızmetkerleri, jumısshı-diyqanlar hám olardıń shańaraq aǵzaları bolǵan, olardıń atların hám esteligin máńgilestiriw boyınsha keyingi jılları Húrmetli Prezidentimiz basshılıǵında elimizde keń kólemli jumıslar ámelge asırılǵanlıǵına toqtalıp ótti.
Bunnan soń, Ózbekstan Ilimler akademiyası Qaraqalpaqstan bólimi jetekshi ilimiy xızmetkeri, tariyx ilimleri doktorı (DSc) Sabit Nurjanov Uzaqbaevich «Repressiyaǵa ushıraǵan prokuratura, ishki isler xızmetkerleriniń ómir jolın hám jámiyetlik xızmetleri”, Ájiniyaz atındaǵı Nókis mámleketlik institutı Qaraqalpaq ádebiyatı kafedrası professorı Qabıl Mambetov Pirniyazovich “Repressiyaǵa ushıraǵan belgili aǵartıwshı, jazıwshı-shayırlardıń ádebiy miyrasin úyreniw hám keń jámiyetilikke tanıstırıw», Repressiya qurbanların eslew muzeyi direktorı Alisher Qudiyarov Rametullaevich “Ózbekstan Respublikası Prezidentiniń 2024-jıl 19-iyuldaǵı PQ-270-sanlı “Siyasiy repressiya qurbanları bolǵan jerleslerimizdiń turmısın hám xızmetlerin úyreniw hám de olardıń atların máńgilestiriw barısında islenip atırǵan jumıslardı keńeytiw haqqındaǵı” qararında belgilengen wazıypalardı úgit násiyat etiw, Repressiyaǵa ushıraǵan belgili mádeniyat hám ilimiy xızmetker, jádidshilik háreketiniń belsendisi Jadid ustazlardıń biri Shımbaylı Máwdit Bekmuxammed ulı “(Qazı Máwlik)” áwladlarınıń biri Qazı, Habibullaev Fayzulla Abdullaevich, Ruwxıylıq hám aǵartıwshılıq orayı Qaraqalpaqstan bólimi bas qánigesi Nariman Shınnazarovlar qatnasıp ilajdıń mazmunlı ótkeriliwine óz úleslerin qostı.
Ilaj dawamında qatnasıwshılarǵa siyasiy repressiya qurbanları bolǵan jerleslerimizdiń miynet jolı, xızmetleri menen jaqınnan tanıstırıldı, student-jaslarǵa saxnalıq kórinisler qoyıp berildi hám ilaj qatnasıwshıları repressiya dáwiri haqqında óziniń qızıqtırǵan sorawların berip, bayanatshılardan qanaatlandırarlı juwaplar aldı. Bunday ilajalar Respublikamızdıń barlıq mákeme shólkemlerinde dawam etip atır.
Baxtiyar Keunimjaev,
Repressiya qurbanların
eslew muzeyi xızmetkeri
