Usı jıldıń 4-oktyabr kúni Berdaq atındaǵı Qaraqalpaq mámleketlik universitetinde Ájiniyaz Qosıbay ulınıń Turkiya mámleketiniń Istanbul qalasında Túrk akademiyası professorı Xuseyn Yıldırım tárepinen túrk tilinde shıǵarılǵan kitaptıń prezentaciyası bolıp ótti. Onda Qaraqalpaq filologiyası hám jurnalistika fakulteti dekanı Q.Turdıbaev, qaraqalpaq ádebiyatı kafedrası professorı Q.Orazımbetov hám basqa da professor-oqıtıwshılar, shayırlar ilimpazlar, jas alımlar, student-jaslar qatnastı. Ilajdı universitettiń ilimiy isler hám innovaciyalar boyınsha prorektorı I.Turdımambetov ashtı hám alıp bardı. Dáslep qaraqalpaq ádebiyatı kafedrası professorı Q.Orazımbetov ilaj qatnasıwshılarına «Ájiniyaz Qosıbay ulınıń Túrk tilinde shıqqan kitabın tanıstırıp, maǵlıwmatlar berdi. Bunnan soń, sózge shıqqanlar shayır Ájiniyaz Qosıbay ulınıń ómir jolı, dóretiwshiligi, sonday-aq, túrk tiline awdarmalanǵan kitap haqqında ózleriniń unamlı pikirlerin bildirdi.
Maǵlıwmat ushın; usı jıldıń 26-27-sentyabr kúnleri Turkiya mámleketiniń Ankara qalasında Pútkil xalıq aralıq Túrk til shólkeminiń X Kongresi bolıp ótken edi. Kongreske pútkil dúnya júzinen 167 tyurkolog (Turkiyadan tısqarı) qatnastı. Kongressti usı shólkemniń Prezidenti Usman Mert ashtı hám alıp bardı. Basqospa májiliske Túrk Akademiyası Prezidenti Shahin Mustafabey, Turkiya mámleketiniń juwapkerli basshıları, túrk tilles ellerdiń diplomatiya korpusı basshıları, belgili tyurkologlar qatnastı.
Onda Xaji Bayram Veli atındaǵı Ankara universitetinde qaraqalpaq shayırı Ájiniyaz Qosıbay ulınıń tuwılǵanına 200 jıl tolıwına baylanıslı shayırdıń túrk tilinde shıqqan kitabınıń tanıstırıw (prezentaciya) máresimi bolıp ótti. Bul máresimge universitet rektorı, Túrk akademiyasınıń Prezidenti, Ózbekstannıń Ankaradaǵı elshisi, Azerbayjan, Qazaqstan, Qırǵızstan hám Turkiya mámleketinen belgili filologlar qatnastı. Tanıstırıw máresiminde kitaptı túrk tiline awdarǵan professor Xuseyn Yıldırım Ájiniyaz dóretiwshiligi tuwralı keńnen túsindirdi. Bunnan keyin usı universitet doktorantları Ájiniyazdıń qosıqlarınan túrk tilinde oqıp berdi.
QMU baspasóz xızmeti
