Búgin 7-oktyabr kúni Berdaq atındaǵı Qaraqalpaq mámleketlik universitetinde universitet Ilimiy keńesiniń gezektegi májilisi bolıp ótti. Onda universitettiń barlıq prorektorları, bólim baslıqları, fakultet dekanları, kafedra baslıqları hám ilimiy keńes aǵzaları qatnastı. Májilisti universitet rektorı Axmed Reymov basqarıp bardı.
Dáslep ilimiy keńes aldınan universitet rektorı A.Reymov Joqarı attestaciya komissiyasınıń Ilim doktorı ilimiy dárejesi hám professor ilimiy ataǵına tastıyıqlanǵan universitet professor-oqıtıwshılarına salatanatı túrde diplomların tapsırdı.
Sonıń menen birge, ilim hám bilimlendiriw tarawındaǵı pidayılıǵı hám xalıqaralıq ilimiy bazalarda maqalalar járiyalaw, sonday-aq, universitet hám birge islesiwshi shólkemler menen xojalıq shártnamaların dúziw jáne student-jaslar ushın oqıw ádebiyatların jaratıwda qosqan salmaqlı úlesi ushın bir qatar professor-oqıtıwshılardı xoshametledi. Bunnan soń, Ilimiy keńestiń kún tártibindegi máseleler menen tanıstırıp ótti.
Kún tártibindegi máseleler boyınsha tiykarınan universitettiń Fizikalıq hám yuridikalıq shaxslardıń múrájatları menen islew, qadaǵalaw hám monitoring bólimi baslıǵı U.Asanov, universitet janındaǵı 12.00.02 – «Konstituciyalıq huqıq. Adminstrativlik huqıq. Qarjı hám bajıxana huqıqı» qánigeligi boyınsha filosofiya doktorı (PhD) ilimiy dárejelerin beriwshi PhD.03/30.12.2019.Yu.20.02 Ilimiy Keńestiń iskerligi haqqında Keńes baslıǵı E.Qutıbaevalardıń bayanatları tıńlananıp, Ilimiy keńes aǵzaları tárepinen maqullandı.
Májilis dawamında rektor A.Reymov student-jaslar menen islesiw, ásirese Jaslar tárbiyasına kóbirek itibar qaratıw, sabaqtan bos waqıtları ilajlar hám joybarlardı kóbeytiw, sonday-aq, studentlerdiń tálim- tárbiyasına baylanıslı arnawlı baǵdarlamalardı islep shıǵıw boyınsha juwapkerlerge tapsırmalar berdi.
Haqıyqatında da universitettiń 2024/2025 oqıw jılına student-jaslar menen islesiwdi jedellestiriw máseleleri ilimiy keńestiń kún tártibiniń áhmiyetli bólegi bolıp, bul processlerdiń barlıǵı studentlerdiń oqıw hám tárbiya procesin jaqsılawǵa qaratılǵan. Ilimiy keńeste qabıl etilgen qararlar oqıw jılınıń tabıslı ótiwi hám studentlerge zamanagóy bilim beriwde úlken áhmiyetke iye.
QMU baspasóz xızmeti
