Usı jıl 9-oktyabr kúni Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministrligi, Qaraqalpaqstan Respublikası Shanaraq hám hayal-qızlar komiteti menen birgelikte «Hayal, biznes, innovaciya» atamasındaǵı Respublikalıq oqıw seminarı hám «Jańa Ózbekstannıń isbilermen hayalları» atamasında ilimiy islenbeler kórgizbesi bolıp ótti.
Seminarda respublikamızdaǵı barlıq Joqarı oqıw orınlarındaǵı belgili ilimpaz professor-oqıtıwshılar, isbilermen hayal-qızlar hám ziyrek student jaslar qatnastı. Dáslep ilimiy-izertlew jumısları menen shuǵıllanıp jurgen hám ilimiy proektleri, innovaciyalıq jańalıqları bar professor-oqıtıwshılardıń miynetleriniń kórgizbesi bolıp ótti. Seminardı universitet Ruwxıylıq isleri boyınsha prorektor Izimbet Turdımambetov kiris sóz benen ashtı.
Bunnan soń Qaraqalpaqstan Respublikası Shańaraq hám hayal-qızlar komiteti baslıǵınıń orınbasarı Gulsara Abibullaeva shıǵıp sóylep, respublikamızdaǵı hayal-qızlar ushın jaratılıp atırǵan imkaniyatlar haqqında aytıp, hayal-qızlarımızdıń jetiskenliklerin maqtanısh penen tilge alındı. Bunnan son seminar barısında házirgi dáwirdegi áhmiyetli máselelerdi sóz etiwshi hayal-qızlar máseleleri menen baylanıslı máseleler boyınsha bayanatlar oqıp esittirildi.
Seminarda Qaraqalpaq mámleketlik universiteti «Menedjment hám ekonomika tiykarları» kafedrası professorı, ekonomika ilimleri doktorı Gulnara Utemuratova, NMPI Qazaq tili hám ádebiyatı kafedrası baslıǵı Írıstı Quttımuratova, «Tadbirkor ayol» Xalıqaralıq Isbilermen Hayallar Associaciyası Qaraqalpaqstan Respublikası aymaqlıq bólimi bas treneri Dina Djumashbaeva, Tashkent informaciyalıq informaciyalar universiteti Nókis filialı, «Sanlı texnologiyalar hám ekonomika» kafedrası docenti Bayramgul Jubanovalar shıǵıp sóylep, elimizdiń rawajlanıwında hayal-qızlardıń ornı girewli bolǵanı ushın, ásirese hayal-qızlardıń turmısında biznestiń roli xaqqında, shetki aymaqlarda hayallardıń isbilermenligin rawajlandırıw sıyaqlı máselelerdi sóz etti.
Seminar barısında soraw-juwaplar bolıp, ilimpaz hayal-qızlar ózleriniń pikir-usınısların bildirip ótti. Seminar júdá qızıqlı hám mazmunlı bolıp ótti.
